अध्यादेश फिर्ता लिन देउवालाई एमाले अध्यक्ष ओलीको चेतावनी, जनमतको अवमुल्यन नगर्न सचेत
नेकपा एमालेका अध्यक्ष केपी शर्मा ओलीले राष्ट्रिय सभा आफू अनुकूल बनाउन सरकारले गैरसंवैधानिक अध्यादेश लगेको बताउनु भएको छ । उहाले सो अध्यादेशका बारेमा निर्वाचित सबैभन्दा ठुलो दललाई अहिलेसम्म पनि थाहा नभएको भन्दै गैरसंवैधानिक अध्यादेश पारित गर्न नहुने स्पष्ट पार्नुभयो । अध्यक्ष ओलीले राष्ट्रिय सभा निर्वाचन अध्यादेशमा खोचे थापेर कांग्रेसले सत्ता लम्ब्याउन चाहेको प्रष्ट हुने समेत बताउनु भयो ।
आफ्नै निवास बाल्कोटमा आज विहान संचारकर्मीसग कुरा गर्दै अध्यक्ष ओली भन्नुभयो, ‘कांग्रेसले लोकतान्त्रिक मान्यता र जनताको अभिमनलाई अवमुल्यन र अस्वीकार गरेको छ । ‘कानुनको खोचे थापेर, बखेडा झिकेर, जनताको अभिमतलाई अवमुल्यन र अस्वीकार गर्ने मनसाय प्रकट भएको छ, मर्यादित संस्थाको अनुचित ब्याख्या र प्रयोग गर्ने कुरा शोभनीय हुँदैन ।’ उहाले अगाडी भन्नुभयो, ‘जहाँ जे लेखे पनि मौजुदा सरकारले नै समानुपातिक सांसद छान्ने भनेर अध्यादेश लगे के हुन्छ, त्यसैले गलत काम मान्नुपर्ने छ भन्ने काही छैन ।’ सरकार गठनका लागि विगतका अभ्यास र नजिरहरु रहेको भन्दै अध्यक्ष ओलीले नयाँ सरकार बनाउन राष्ट्रिय सभा गठन आवश्यक नरहेको स्पष्ट पार्नुभयो ।
निर्वाचन आयोगले पनि कानुनअनुसार काम गर्नुपर्नेमा जोड दिंदै आयोग कसैको ट्विटका पछाडि होइन, संविधान र कानुन अनुसार चल्नुपर्ने बताउनु भयो । प्रदेश प्रमुख नियुक्तिमा देउवा सरकारले कसरत गरेकोप्रति असन्तुष्टि जनाउँदै अध्यक्ष ओलीले कांग्रेसले नियुक्त गरेको जो पायो त्यहीबाट शपथ ग्रहण नगर्ने भन्दै सत्ता हस्तान्तरणको बाटो खोल्न आग्रह गर्नुभयो ।
