मतदाता नउठ्दै जब मेयर सुनारगाउँ पुगे….
काठमाडौं— शुक्रबार बिहानै आफ्ना जनप्रतिनिधिलाई आफ्नै घर–आगनमा देख्दा काठमाडौंको सुनार गाउँका बासिन्दा निकै उत्साहित भए । आफैँले भोट दिएर जिताएपछि अर्को चुनावसम्म नाकमुख नदेखेका मतदाताका लागि नौलो कुरा थियो– काठमाडौं महानगरपालिकाका मेयर विद्यासुन्द्यर शाक्य बिहानै घरघरमा पुग्नुभएको थियो ।
मेयर शाक्यसहित काठमाडौँ क्षेत्र नम्बर–९ का वाम गठबन्धनका तर्फबाट संघका उम्मेदवार कृष्णगोपाल श्रेष्ठ र प्रदेशसभा ‘क’का उम्मेदवार डा. अजयक्रान्ति शाक्यसँग सुरुमै कलंकी सुनार वस्तीका वासिन्दाले गुनासो पोख्न भ्याए । ‘तपाईँहरु यही चुनावभरी त होला नि हाम्रो घर–आँगनमा देखिने ?’ एक स्थानीयले विगतको तितो अनुभव यसरी पोख्दै गर्दा मन्द मुस्कानसहित मेयर शाक्यले जवाफ फर्काउनुभयो । ‘तपाईँहरुले भोट दिएर जिताउनुभयो, यो ठाउँको विकास गर्नुहोस् भन्ने जिम्मेवारी मेरो काँधमा राखिदिनुभयो । अब म तपाईँहरुको घरदैलोमा नआएर कहाँ जाने ?’ मेयर शाक्यकै भनाईमा थप गर्दै कृष्णगोपालले पनि जनताको भोट पाएर जितेपछि जनतालाई कहिल्यै नविर्सिने प्रतिवद्धता व्यक्त गर्नुभयो ।
सबै दृष्यलाई निहाली रहनु भएका त्यही गाउँका ९६ वर्षीय एक वृद्धले विकासबारे चासो राख्दै घरदैलोमा आउनुभएको मेयर शाक्य, उम्मेदवार श्रेष्ठ र शाक्यलाई जितको शुभकामना दिन भ्याउनुभयो । उहाँले त्यसरी शुभकामना दिदैँ गर्दा एक पटक स्थायी सरकार बनेको देखेर मर्ने इच्छा भएको पनि वताउनुभयो ।
वृद्धामात्र होइन त्यो क्षेत्रका सबैले स्थायी र विकासका लागि प्रष्ट दृष्टिकोण भएको नेता चाहिएको विचार व्यक्त गरे । करिब दुई घण्टा कलंकी चोक, सन्तोषीनगर, सुनार गाउँलगायतका स्थानमा दुई उम्मेदवारसँगै मेयर पनि घुम्नुभयो । मेयर शाक्यले सोही क्रममा काठमाडौँ वडा–१४ सुनार गाउँ कलंकी मन्दिर छेउको ढलको समेत अवलोकन गर्नुभयो । स्थानीयले उक्त ढल स्थानीयका लागि निकै ठूलो समस्या रहेको गुनासो गरेपछि शाक्यले तत्काल त्यो ढल मर्मत गर्न वडा तहबाटै गर्न निर्देशन दिनुभयो । ‘यहाँबाट भएन भने मलाई सम्पर्क गर्नुहोस्,’ उहाँले भन्नुभयो ‘तत्काल समाधान गर्नेछु ।’
