चमेलियाबाट विद्युत् उत्पादन शुरु
दार्चुलामा निर्माण सम्पन्न ३० मेगावाटको चमेलिया जलविद्युत आयोजनाको विद्युत राष्ट्रिय प्रसारणमा जोड्ने बलाँच–अत्तरिया १३२ केभी प्रसारण लाइन सञ्चालन भएको छ । दक्षिण कोरियाको ऋण लगानीमा तयार १ सय ३१ किलोमिटर लामो प्रसारण लाइन बिहीबार दिउँसोबाट सञ्चालन भएको हो ।
कैलालीस्थित अत्तरिया ग्रीडको विद्युत प्रवाह गरेर दिउँसो १.५५ बजेबाट प्रसारण लाइन र सबस्टेसन सञ्चालन गरिएको आयोजना प्रमुख अजयकुमार दाहालले बताए । चमेलियाबाट विद्युत उत्पादन सुरु गर्नुअघि प्रसारण लाइन तयारी अवस्थामा राख्न सञ्चालन गरिएको उनले बताए ।
चमेलियाबाट परीक्षण उत्पादन सुरु भएको दिनदेखि नै यो प्रसारण लाइनमार्फत राष्ट्रिय प्रणालीमा जोडिने प्राधिकरणले जनाएको छ ।
प्रसारण लाइन तयार भएपछि अहिले वैकल्पिकरूपमा ३३ केभी लाइनमा जोडिएको ८.५ मेगावाटको नौगाड जलविद्युत केन्द्रको विद्युत जोड्न आवश्यक प्रक्रिया पूरा गर्न अपि पावर कम्पनीलाई पत्राचार गरिएको दाहालले बताए ।
बलाँच–अत्तरिया महाकाली करिडोरलाई उत्तर दक्षिणमा जोड्ने पहिलो र एकमात्र प्रसारण लाइन हो ।
प्रसारण लाइनकोे डबल सर्किट टावर निर्माण गरिएको भए पनि अहिले सिङ्गल सर्किट लाइन मात्र जडान गरेर संचालन गरिएको छ । डबल सर्किट लाइन जोड्ने काम चालु आर्थिक वर्षभित्रै सुरु गर्ने प्राधिकरणको तयारी छ ।
यो प्रसारण लाइन सञ्चालन भएपछि चमेलियासहित निजी क्षेत्रले निर्माण गरिरहेको २ सय मेगावाट विद्युत राष्ट्रिय प्रसारणमा जोड्न बाटो खुलेको छ । प्रसारण लाइनमा चमेलियासहित ८६ मेगावाटको चमेलिया छत्तिसगाड, ४० मेगावाटको माथिल्लो चमेलिया, ८.५ मेगावाटको नौगाड र ५४ मेगावाटका कालंगागाडका आयोजनाको विद्युत राष्ट्रिय प्रणालीमा जोडिने छ ।
