आरजुको दबाबमा ९ डीआईजीको दरबन्दी थप्ने तयारीमा देउवा,चुनाबमा धाधली गर्न ३५ जिल्लाका सिडिओ परिवर्तन गर्ने यस्तो छ देउवाको दाउ

राजनीतिक भागबण्डा मिलाउन ४ एआईजीको दरबन्दी रहेको नेपाल प्रहरीमा दरबन्दी थपेर हाल १६ एआईजी पु¥याइएको छ । अनावश्यक रुपमा दरबन्दी थपेर ४ डीआईजीलाई एआईजीमा बढुवा सिफारिश गरिएको हप्ता दिन नपुग्दै सरकारले ९ डीआईजीको दरबन्दी थप्ने तयारी गरेको छ । उच्च स्रोतका अनुसार हाल रिक्त रहेको ५ डीआईजी पदका लागि १९ जना एसएसपीहरुले बढुवाका लागि दौडधूप सुरु गरेपछि सरकारलाई डीआईजी बढुवा मिलाउन हम्मेहम्मे परेको छ । यता मतदानको चार दिनअघि बागलुङका प्रहरी प्रमुख चन्द्रकुबेर खापुङ सरुवाः भएको छ। ३५ जिल्लाका सिडिओ परिवर्तन गर्न गृहसचिव मोहनकृष्ण सापकोटालाई प्रधानमन्त्रीले लिष्ट थमाएको बुझिएको छ।

क्षमतावान् र योग्यलाई छान्नुको सट्टा विवादित र आफ्ना नातागोताका अधिकृतहरुलाई डीआईजीमा बढुवा गर्न दरबन्दी थप्न लागिएको स्रोतको दाबी छ । उच्च स्रोतका अनुसार सातवटै प्रदेशमा सरकारले एआईजी खटाएपछि यसअघिका पाँचवटा क्षेत्रीय कार्यालयका डीआईजीहरु जिम्मेवारीविहीन छन् ।

सरकारले नेपाल प्रहरीलाई संघीय संरचनाअनुसार रुपान्तरण गरेपछि नाम परिवर्तन भई बनेको १४ वटा संघीय प्रहरी इकाइ कार्यालयमा डीआईजीको दरबन्दी राख्ने तयारी गरिएको छ । ती कार्यालयमा पदपूर्तिका लागि तत्कालीन क्षेत्रीय प्रहरी कार्यालयका ५ डीआईजीको दरबन्दीलाई स्थानान्तरण गर्ने र नपुग ९ दरबन्दी थप्ने गरी गृह मन्त्रालयले प्रक्रिया अघि बढाएको गृहस्रोतको दाबी छ ।

हाल नेपाल प्रहरीमा प्रशासनतर्फ २६ जना डीआईजीको दरबन्दी छ । कुनै पनि संस्थामा दरबन्दी थप गर्नका लागि ओएनएम सर्भे गर्नुपर्ने हुन्छ । तर, पछिल्लो समय राजनीतिक भागबण्डा मिलाउन हचुवाका भरमा धमाधम माथिल्लो तहको दरबन्द थप्ने परिपाटीले प्रहरी संगठनको भविष्य नै अन्योलमा पर्ने बताउँछन्, पूर्वडीआईजी हेमन्त मल्ल ठकुरी । ‘संगठनको आवश्यकता के हो, कुनकुन पदको दरबन्दी थप्नुपर्ने हो, त्यसबारेमा ओएनएम सर्भे गर्नुपर्ने हुन्छ,’ उनले भने, ‘यसरी जथाभावी दरबन्दी थप्नु संगठनको हितमा हुँदैन ।’

नेपाल प्रहरीमा प्रशासनतर्फ कायम रहेको २६ र थपिन लागिएको ९ समेत गर्दा डीआईजीको संख्या ३५ पुग्ने भएको छ । हाल रिक्त ५ र थपिने ९ गरी १४ डीआईजी पदका लागि १९ जना एसएसपी बढुवाको दौडधूपमा लागेका छन् । आफू निकटका प्रहरी अधिकारीलाई बढुवा गराउन बढुवा समितिका पदाधिकारीहरुलाई विभिन्न शक्तिकेन्द्रबाट दबाब आउन सुरु भइसकेको छ ।

प्रधानमन्त्री कार्यालय स्रोतका अनुसार वरीयताको १६ नम्बरमा रहेका एसएसपी सुशीलकुमार भण्डारीलाई डीआईजीमा बढुवा गर्न प्रधानमन्त्री शेरबहादुर देउवाले गृहसचिव सापकोटालाई निर्देशन दिइसकेका छन् भने वरीयताको ९ नम्बरमा रहेका दिनेश अमात्यलाई बढुवा गर्न प्रधानमन्त्रीपत्नी आरजु देउवाले दबाब दिँदै आएकी छिन् । अमात्य विवादास्पद प्रहरी अधिकारी हुन् । गुण्डानाइकेसँग विशेष साँठगाँठ रहेका उनी अपराध महाशाखामा कार्यरत रहँदा विभिन्न असुली तथा फर्जी इन्काउन्टरको विवादमा तानिएपछि ६ महिनामै त्यहाँबाट सरुवा भएका थिए । बढुवामा पर्नका लागि उनले चुनाव खर्च भन्दै शक्तिकेन्द्रमा बिफ्रकेश बुझाइसकेको प्रहरी मुख्यालयमा चर्चाको विषय बनेको छ ।

त्यस्तै, वरीयताको दोस्रो नम्बरमा रहेका एसएसपी कृष्णप्रसाद गौतमलाई डीआईजीमा बढुवा गर्न प्रधानन्यायाधीश गोपाल पराजुलीको चर्को दबाब रहेको बुझिएको छ । गौतम र पराजुली नाताले ज्वाइँ–जेठान हुन् । नवलपरासीको एसपी हुँदा आर्थिक प्रलोभनमा परी ज्यान मुद्दाका अभियुक्तलाई छाडेको आरोपमा निलम्बनमा परेका गौतम विवादास्पद प्रहरी अधिकृत हुन् ।

यस पटकको बढुवामा तुलनात्मक रुपमा सुभाष चौधरी, रवीन्द्रप्रसाद शर्मा, दीपककुमार थापा, केदार रिजाल, शेरबहादुर बस्नेत, पीताम्बर अधिकारी कमलबहादुर जिटी, दानसिंह बोहोरा, नारायणसिंह खड्का, सुरज केसी र महेशविक्रम शाह बढुवाका बलिया उम्मेदवार हुन् । उनीहरुका अलावा प्रेम चन्द, श्याम खड्का, विष्णुहरि गौतम, रामप्रसाद श्रेष्ठ, महेन्द्रकुमार पोखरेल र मोहनराज जोशी डीआईजी बढुवाका आकांक्षी हुन् ।

नेपाल प्रहरीका प्रवक्ता डीआईजी मनोज नेउपानेले डीआईजी पदको दरबन्दी थप्ने विषय सरकारको रहेको बताए । उनले भने, ‘यो सरकारको जानकारीको विषय हो । यसबारे हामीलाई केही थाहा छैन ।’