आज अन्तिम दिन चुनाबी नतिजा हत्याउन शीर्ष नेता मैदानमा,को-को कहाँ-कहाँ कुर्लिदैछन्
सधैं राज्य र दलहरूबाट कर्नर परेको भनी गुनासो गर्दै आएको मधेसमा यतिखेर गज्जबको निर्वाचनको माहोल छ । नेपालका सम्पूर्ण राजनीतिक दलका शीर्ष नेता यतिखेर मधेसमै छन् । लामो समयदेखि प्रमुख दलका नेताहरूलाई भेट्न र आफ्ना समस्या राख्न नसक्ने तराईवासीकहाँ हिजोआज नेताहरू आफैं पुगी विभिन्न वाचा गरिरहेका भेटिन्छन् ।
असोज २ गते हुने स्थानीय तहको निर्वाचनको प्रचार प्रसारको अन्तिम दिन आज प्रमुख दलका सबै शीर्ष नेता तराईका आठ जिल्ला केन्द्रित छन् । शुक्रबार मध्यरातिदेखि मौज अवधि सुरु हुने भएकाले प्रायः नेताहरूले आज दुई दुई ठाउँमा चुनावी कार्यक्रममा सहभागिता जनाउने गरी कार्यतालिका सार्वजनिक गरेका छन् ।
संघीय समाजवादी फोरम, राजपा, नेपाल लोकतान्त्रिक फोरमलगायतका दलका शीर्ष नेताहरू भने आज एक दर्जनभन्दा बढी स्थानका चुनावी कार्यक्रममा व्यस्त हुने भएका छन् । राप्रपा अध्यक्ष कमल थापाबाहेक सबै दलका अध्यक्ष मधेसमै छन् । थापा भने चुनाव प्रचार प्रसारमा नजाने भएका छन् ।
प्रदेश नम्बर दुईमा असोज दुई गते हुने स्थानीय तहको निर्वाचनको प्रचार प्रसार गर्ने आज अन्तिम दिन हो । चुनावी प्रचार प्रसारका प्रमुख तीन दलका शीर्ष नेता आज मधेसमा अति नै व्यस्त छन् । नेपाली कंग्रेसका सभापति तथा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल र एमाले अध्यक्ष केपी ओलीले विभिन्न स्थानमा हुने चुनावी सभालाई आज सम्बोधन गर्ने कार्यक्रम छ ।
देउवाले प्रदेश नम्बर २ अन्तर्गतको एउटा मात्र महानगर वीरगञ्जमा अपरान्ह २ बजे हुने सभालाई सम्बोधन गर्नेछन् । त्यसअघि उनले बाराको कलैया नगरपालिकामा हुने चुनावी सभालाई अपरान्ह १ बजे सम्बोधन गर्ने कार्यक्रम रहेको कंग्रेसले जनाएको छ ।
माओवादी केन्द्रका अध्यक्ष प्रचण्डले सर्लाहीको लालबन्दी र वीगञ्जको चुनावी सभालाई सम्बोधन गर्ने भएका छन् । एमाले अध्यक्ष ओलीले बाराको सिमरा जितपुर उपमहानगरको चुनावी सभा र महोत्तरीको बर्दिबासमा हुने सभालाई सम्बोधन गर्दैछन् । ओली प्रदेश नम्बर २ मा पहिलो पटक सहभागी हुन जान लागेका हुन् । बर्दिवासको चुनावी सभामा उनले राजपाका महामन्त्री जंगीलाल रायलाई एमाले प्रवेश गराउन लागेका छन् ।
संघीय समाजवादी फोरमका अध्यक्ष उपेन्द्र यादव सिरहाका विभिन्न स्थानमा हुने चुनावी सभामा सरिक हुने बताइएको छ । राष्ट्रिय जनता पार्टीका शिर्षस्थ नेता पनि २ नम्बर प्रदेशका आठवटै जिल्लामा आज हुने सभाको तयारीमा व्यस्त छन् । महन्थ ठाकुर पहिलोपल्ट चुनावी कार्यक्रममा सहभागी हुँदैछन् । राजेन्द्र महतो, शरत्सिंह भण्डारी, महेन्द्र राय यादव, अनिलकुमार झा, राजकिशोर यादवलगायत सबै तराईमा छन् ।
नेपाल लोकतान्त्रिक फोरमका अध्यक्ष विजय कुमार गच्छदारले सिरहा, धनुषा र सर्लाहीमा हुने चुनावी सभालाई सम्बोधन गर्ने कार्यक्रम छ । यस्तै, नयाँ शक्ति पार्टीका संयोजक बाबुराम भट्टराईले पनि बारा, रौतहट र पर्साका विभिन्न सभामा सहभागिता जनाउने भएका छन् ।
