स्वरोजगार बनाउन युवालाई बिनाधितो ऋण
गौमूल गाउँपालिकाले युवा स्वरोजगारको नीति अघि सारेको छ ।
बेरोजगार युुवालाई स्वरोजगार बनाउन र गाउँमै व्यावसायिक बनाउने उद्देश्यले बिनाधितो ऋण उपलब्ध गराउने गरी गाउँसभाबाट सो नीति पारित गरिएको गौमूल गाउँपालिका अध्यक्ष हरिबहादुर रोकायाले बताउनुभयो ।
बेराजगार युवाका लागि नागरिकता र शैक्षिक प्रमाण पत्रका आधारमा धितो बीउ पुँजी दिएर प्रत्येक वडामा युवा स्वरोजगार कार्यक्रम सञ्चालन गर्न लागेको उहाँको भनाइ छ । उहाँले ‘आफ्नै व्यवसाय आफै रोजगार’ नाराका साथ युवालाई सहकारीमार्फत ऋण उपलब्ध गराउने बताउनुभयो ।
गाउँपालिकामा रहेका सहकारीमार्फत युवा स्वरोजगारका लागि रु ९० लाख बजेट विनियोजन गरिएको छ । विदेशमा गई काम गर्नुभन्दा गाउँमै ऋण लिएर व्यवसाय गर्न युवालाई परिचालन गर्न गाउँपालिका लागिपरेको रोकाया बताउनुहुन्छ । स्थानीय उत्पादन, शिक्षा, स्वास्थ्य र सीप विकासका कार्यक्रमलाई प्राथमिकतामा राखेर काम गरिने उहाँको भनाइ छ ।
“सम्पूर्ण काम विद्युतीय मेसिनबाट गर्ने योजना बनाएका छौँ,” रोकायाले भन्नुभयो । गौमूल गाउँपालिकाले ‘आत्मनिर्भर जनता गौमूल समृद्धिको आधार, शिक्षा र स्वास्थ्यमा सुधार, जडीबुटी, पर्यटन, प्रवद्र्धन र कृषिजन्य व्यापार’ नारा अघि सारेको छ ।
शैक्षिक पाश्र्व चित्र निर्माण गर्ने, विद्यालय समायोजना गर्ने, १५ श्ययाको अस्पताल निर्माण, प्रत्येक महिला स्वास्थ्य स्वयम्सेविकालाई एसएमएस रिपोटिङका लागि मोबाइल र मासिक रिचार्ज खर्च व्यवस्थापन गर्ने निर्णय गरिएको छ । खानेपानी गुरु योजना निर्माण गर्ने र पाँच वर्षमा सबै घरमा खानेपानीको सहज पहुँच पु¥याउने निर्णय गरिएको अध्यक्ष रोकायाले बताउनुभयो ।
सो गाउँपालिकाले कृषि खेतीलाई आधुनिक र व्यावसायिक बनाइ प्रत्येक घरमा अनिवार्य करेसाबारी निर्माण, दैनिक हरियो साग प्रयोग गर्ने नीति अघि सार्नुका साथै एक हल गोरु, एक दुहुनो गाई वा भँैसी र बाख्रापालन व्यवसायलाई अनिवार्य गर्ने निर्णय गरेको छ । भेलाले एक गाउँ एक सहकारी र सामाजिक सुरक्षा भत्तालाई बैँकिङ सेवामार्फत वितरण गर्ने नीति अघि सारेको छ ।
