निर्वाचन आचारसंहिता आजबाट लागू,उल्लघंन गरे मनोनयन रद्द सहित एक लाख जरिवाना
निर्वाचन आयोगले आसन्न प्रतिनिधि सभा तथा प्रदेश सभाको निर्वाचनका लागि निर्वाचन आचारसंहिता जारी गरेको छ । जारी आचारसंहिता आजदेखि लागू भएको छ । आचारसंहिता लागूपछि निर्वाचन प्रभावित गर्ने कुनै पनि काम गर्न पाइने छैन ।
आचारसंहिता उल्लङ्घनमा आयोगले एक लाख रुपैयासम्म जरिवाना र उम्मेदवारी रद्द समेत गर्न सक्नेछ ।
आयोगले निर्वाचन आचारसंहिता जारी गरेपछि सरकारले कुनै पनि कर्मचारीको सुरुवा, बढुवा तथा पदस्थापन समेतका काम गर्न पाउदैन । तर, निर्वाचन आयोगले आचारसंहिता प्रभावित नहुने ठहर गरी अनुमति दिएको अवस्थामा भने सरकारले आवश्यक निर्णय लिन सक्नेछ ।
आयोगले जारी गरेको आचारसंहिता सरकार, सरकारका मन्त्री, स्थानीय र कर्मचारी, सार्वजनिक संस्था तथा कर्मचारीलाई लागू हुनेछ । यस्तै, सरकारी तथा अर्धसरकारी संस्था, कार्यालय र कर्मचारीलाई पनि आचारसंहिता लागू हुनेछ । जारी आचारसंहिता सुरक्षा संगठन र कर्मचारीहरुमा पनि लागू हुनेछ। निर्वाचनको काममा संलग्न कर्मचारी र सार्वजनिक पद धारण गरेको व्यक्तिलाई पनि आचारसंहिता लाग्नेछ ।
उम्मेदवारका हकमा भने मनोनयन दर्तापछि आचारसंहिता लाग्ने निर्वाचन आयोगले जनाएको छ ।
त्यस्तै आचारसंहिता उल्लङ्घन गरेमा निर्वाचन आयोग ऐन, २०७३ बमोजिम आयोगले एक लाख रुपैयाँसम्म जरिवाना गर्न सक्नेछ ।
उम्मेद्वारको हकमा मनोनयन रद्द गर्नेसम्मको अधिकार निर्वाचन आयोगलाई छ ।र एक लाख सम्म जरिवाना हुने व्यवस्था पनि छ।
