प्रचण्डका ज्वाईको जाहेरी पछि मेयरका उम्मेदवार देवी ज्ञवालीका छोरा प्रहरी नियन्त्रणमा
चितवनको भरतपुर महानगरपालिकामा नेकपा एमालेका तर्फबाट मेयरका उम्मेदवार देवी ज्ञवालीका छोरा निरब ज्ञवालीलाई प्रहरीले आज पक्राउ गरेको छ । माओवादी नेतृ रेणु दाहालको चरित्र हत्या गरेको आरोपमा उनलाई प्रहरीले काठमाडौंको पुतलिसडकबाट पक्राउ गरेको हो ।
सामाजिक सञ्जाल मार्फत दाहालको चरित्रहत्या गरेको आरोपमा उनी पक्राउ परेका हुन् । रेणु दाहालका श्रीमान अनिल कुमार पाठकले किटानी जाहेरी दिएपछि प्रहरीले उनलाई पक्राउ गरेको हो । उनीसँगै अर्का एक जना एमाले कार्यकर्ता पनि पक्राउ परेका छन् । पाठकले शुक्रवार जिल्ला प्रहरी कार्यालय चितवनमा जाहेरी दिएका थिए । साइबर अपराध मुद्दा काठमाडौं जिल्ला अदालतले मात्रै हेर्ने भएकोले काठमाडौं प्रहरीबाटै हेर्ने गरि उनलाई पक्राउ गरिएको हो ।
विद्युतीय कारोबार ऐन २०६३ को दफा ४७ अनुसार कसुर प्रमाणित भएमा दुई लाख जरिवाना र पाँच वर्ष सम्म कद हुन सक्छ वा दुबै सजाय हुन सक्छ । निरव र उनीसँग पक्राउ परेका एसबी बोहोराको फेसबुकबाट रेणुलाई गालीगलौज गरेका सामग्रीहरु पोष्ट भएका थिए । त्यसै लाइ आधार बनाएर प्रहरीले दुवै लाइ नियन्त्रणमा लिएको हो।
