दार्जीलिङमा आन्दोलनकारीले नेपाली भेषभूषामा जुलुस निकाले,दार्जीलिङबाट सेना फिर्ता बोलाइयो

गोर्खाल्याण्डको माग गर्दै ३३ दिन यता बाट जारी आन्दोलन अझै मथ्थर भएको छैन,अरु उग्र बन्न थालेको छ।
पश्चिम बंगाल सरकारको अनुरोधमा दार्जीलिङबाट सेना हटाइएपछि गोर्खाल्यान्ड समर्थकहरूले बिहीवार हिंस्रात्मक प्रदर्शन गरेका छन् । उनीहरूले लामाहत्तामा दुईवटा सरकारी कार्यालयमा आगजनी गरे ।

गोर्खा जनमुक्ति सेना (गोजमो) का समर्थकहरूले कर विभागको कार्यालय र पञ्चायत कार्यालयमा पेट्रोल बम प्रहार गरेर खरानी बनाइदिएको प्रहरीले बतायो ।
गोजमो तथा अन्य दलका समर्थकहरूले जिल्ला मजिस्ट्रेटको कार्यालयबाहिर पनि प्रदर्शन गर्दै इन्टरनेट सेवा पुनर्बहाली गर्न माग गरे । दार्जीलिङमा विगत ३३ दिनदेखि इन्टरनेट सेवा अवरुद्ध छ ।
राज्य सरकारको अनुरोधमा जुलाई ८ मा सेना तैनाथी गरिएकोमा जुलाई १८ देखि सेनालाई फिर्ता बोलाइएको एक रक्षा अधिकारीले बताए ।
पहाडका विभिन्न दलले पश्चिम बंगालका गभर्नर केएन त्रिपाठीलाई बिहीवार भेटेर एक ज्ञापनपत्र बुझाएका छन् ।
केही पार्टी कार्यकर्ताले परम्परागत नेपाली भेषभूषामा सजिएर बिहान –याली निकाले ।
प्रहरी र सुरक्षाबलले सडकमा गस्ती गरेर प्रवेशविन्दुहरूमा कडा निगरानी गरिरहेको छ । औषधिपसलबाहेक सबै पसल, रेस्टुराँ, होटेल, विद्यालय र कलेजहरू बन्द छन् ।