सञ्चारमाध्यमलाई जवाफदेही बनाउन आमसञ्चार नीति आवश्यक
बनेपा । सङ्घीय संरचनामा आमसञ्चार नीति र सूचना तथा सञ्चार मन्त्रालयको ढाँचा कस्तो बनाउने भन्ने विषयमा आज विज्ञहरुले यहाँ छलफल गरेका छन् ।
सूचना तथा सञ्चारमन्त्रालय र राष्ट्रिय आमसञ्चार नीति कार्यान्वयन उच्चस्तरीय सुझाव समितिले धुलिखेलमा सञ्चालन गरेको दुईदिने राष्ट्रिय सञ्चार नीति र कार्यान्वयन विषयको गोष्ठीमा उनीहरुले सञ्चारमाध्यमलाई बढी जवाफदेही र उत्तरदायी बनाउन आमसञ्चार नीति ल्याउनुपर्नेमा जोड दिएका छन् ।
विज्ञहरुले भनेका छन् – “कतिपय ऐनलाई खारेज वा पुनरवलोकन गर्नुपर्ने भएको छ ।”
सूचना तथा सञ्चार मन्त्रालयका सचिव महेन्द्रमान गुरुङले सञ्चारमाध्यममा भएको एकाधिकार तोड्नुपर्ने आवश्यकतामा जोड दिँदै सञ्चार संस्थाले आफ्नो कामको गुणस्तर बढाउनुपर्ने सुझाव दिनुभयो ।
उहाँले पूर्ण प्रेस स्वतन्त्रता र अभिव्यक्ति स्वतन्त्रतामा आँच नआउने गरी राष्ट्रिय आमसञ्चार नीति कार्यान्वयनमा ल्याइनुपर्ने विचार व्यक्त गर्नुभयो ।
प्रशासकीय अदालतका अध्यक्ष तथा सञ्चार विज्ञ काशीराज दाहालले लोकतन्त्रलाई सुदृढ गर्न र सूचना पाउने नागरिकको अधिकारलाई सम्मान गर्न सञ्चारमाध्यम जिम्मेवार र मर्यादित हुनुपर्ने आवश्यकता औँल्याउँदै संघीय कानूनसँग बाझिने गरी कानून नल्याउन सुझाव दिनुभयो ।
सूचना तथा सञ्चार मन्त्रालयका सहसचिव प्रेमकुमार श्रेष्ठले संघीय संरचनामा सञ्चार मन्त्रालयअन्तर्गतका निकायका लागि नयाँ ऐन, कानूनको तर्जुमा आवश्यक भएको उल्लेख गर्नुभयो ।
प्रेस काउन्सिल नेपालका अध्यक्ष भवानी बरालले मुलुकको आर्थिक, राजनीतिक, सामाजिक विशेषतासहितको रुपरेखा आमसञ्चार नीतिमा आउनुपर्ने उल्लेख गर्दै पत्रपत्रिकाको वितरण सम्परीक्षण प्रणाली पुरातन किसिमको भएको बताउनुभयो ।
वितरण सम्परीक्षणको अङ्क ५५ बाट घटाएर आचारसंहिता र गुणस्तरमा वृद्धि गर्नुपर्ने उहाँको सुझाव छ ।
नेपाल टेलिभिजनका अध्यक्ष महेशराज दाहालले मुलुकको परिवर्तित अवस्थामा आमसञ्चार नीतिको परिमार्जन आवश्यक भएको बताउनुभयो ।
सञ्चार नीतिमाथिको छलफलबाट उठेका विषयलाई सम्बोधन हुने गरी आ–आफ्नो क्षेत्रको प्रतिवेदन तयार गर्नसमेत सम्बन्धित सञ्चार संस्थालाई बढीमा १५ दिनको समयसीमा तोकिएको छ ।
सो कार्यक्रममा राष्ट्रिय समाचार समितिका महाप्रबन्धक ओपेन्द्र शर्मा, सञ्चार विज्ञ टीकाराम राई, प्रेस काउन्सिलका सदस्य ईश्वरी ओझालगायतले आमसञ्चार नीतिको परिमार्जनबारे आ–आफ्नो धारणा व्यक्त गर्नुभएको थियो ।
रासस कार्यालय निरीक्षण
राससका महाप्रबन्धक शर्माले आज यहाँस्थित रासस जिल्ला कार्यालयको निरीक्षण गर्नुभयो । उहाँले जिल्लामा समाचार संकलनको विधि, काभ्रेपलाञ्चोक आसपास बाहिरबाट गरिने समाचार सम्प्रेषण र जिल्ला समाचारदाताले समाचार सम्प्रेषण गर्ने विधिबारे जानकारी लिनुभएको थियो ।
महाप्रबन्धक शर्माले जिल्ला कार्यालयको भौतिक पूर्वाधारको अवस्थाबारे जानकारी लिँदै आफ्नो कामलाई छिटो छरितो ढंगले सम्पन्न गर्न पनि निर्देशन दिनुभयो । उहाँसँगै प्रेस काउन्सिल नेपालका अध्यक्ष भवानी बराल पनि हुनुहुन्थ्यो । कार्यालयको भौतिक अवस्था र गतिविधिबारे रासस जिल्ला कार्यालयका प्रमुख युवराज पाण्डेले जानकारी दिनुभएको थियो ।
