नेपालका होटल दक्षिण एसियामै उत्कृष्ट छन्

कृष्णकुमार अर्याल, सदस्य, नेपाल पर्यटन बोर्ड
एक अर्ब भन्दा बढी बजेट भएको नेपाल पर्यटन बोर्ड नेपाललाई पर्यटन गन्तव्य बनाउने अभियानमा क्रियाशील छ । दुई वर्षअघिको भूकम्प र भारतले लगाएको अघोषित नाकाबन्दीका थिलोथिलो भएको पर्यटन क्षेत्रलाई ‘रिभाइब’ गर्ने अभियानमा जुटेको पर्यटन बोर्डले के गरिरहेको छ त ? पर्यटन बोर्डका सदस्य कृष्णकुमार अर्यालसँगको संक्षिप्त कुराकानीः

अहिलेको समग्र पर्यटन क्षेत्रको अवस्था कस्तो छ ?

२०७२ साल वैशाख १२ गते गएको भूकम्पले भन्दा पनि भारतले लगाएको आर्थिक नाकाबन्दीले पर्यटन क्षेत्रमा बढी नोक्सान पुगेको हो । भूकम्प जानु, जनधनको नोक्सान हुनु दुःखदायी कुरा हो । यद्यपि यसले विश्वसामु नेपाललाई चिनाउने काम गरेको छ । ‘नेपाल’ भन्ने देश थाहा नभएकाले पनि चिन्नेजान्ने मौका पए । पर्यटन क्षेत्रमा केही असर परे पनि विश्वभर प्रचार नकारात्मक नै भयो । सन २०१६ को डिसेम्बरसम्ममा करिब ७ लाख विदेशीले नेपाल भ्रमण गरेका छन् । यो सन २०१५ को तुलनामा बढी हो । यस हिसाबले समग्र पर्यटन क्षत्रमा आशाका किरण जागेको छ । तथ्यांकहरु हेर्दा त्यति नराम्रो छैन । दुई वर्ष चल्न नसकेको एभरेष्ट एक्स्पेडिसन पोहोर पनि चल्यो । यसपालि पनि त्यही अनुपातमा चलेको छ । हामी आशावादी छौँ ।

अन्य क्षेत्र भन्दा होटल व्यवसायमा बढी असर परेको हो ?

होेटलमा केही असर परेको देखिन्छ तर पर्यटन कम भएर होइन । होटलको संख्या थपिएको कारण त्यस्तो देखिएको हो । काठमाडौँमा ४ वटा तारे होटलबाट अहिले ४० वटा पुगेको छ । त्यस हिसाबले मात्र अलि कम भएको हो कि जस्तो मात्र देखिन्छ । वास्तवमा होटलको व्यवसाय घटेको छैन । केही ठूला व्यवसायीहरु भन्छन्, प्रतिशतमा घटेको छैन । दक्षिण एसियामा नेपालका होटलले दिने सेवा उत्कृष्ट मानिन्छ र विदेशी पाहुनाले नेपाल र नेपालीलाई विश्वास गर्छन् । त्यही कारण पाहुनाहरु नेपाल आउँछन् र हाम्रो पर्यटन क्षेत्र राम्रो हुँदैछ ।

यो आर्थिक वर्षमा पर्यटक भित्र्याउन पर्यटन बोर्डले के के काम गरेको छ ?

विश्वका विभिन्न देशमा पर्यटनसम्बन्धी हुने सम्मेलनमा प्रचारका कामहरु लिएर सहभागी भयौँ । अन्तर्राष्टिय रुपमा बिबिसीमा विज्ञापन दिने काम सुरु भएको छ । अन्तर्राष्टिय सञ्चार संस्था राइटससँग मिलेर नेपालको विभिन्न पर्यटकीय क्षेत्रको कथा, व्यथा, संस्कृतिलाई लेखेर दिने त्यहाँ भएका विभिन्न इभेन्टमा त्यसको प्रचार प्रसारका काम गरिरहेका छौँ । भरखरै हामीले ‘नेपाल हिमालयको गेट वे’ हो भन्ने चार दिने कार्यक्रम गरेका छौँ । हालै ३२ देशका १ सय ७ सामाजिक सञ्जालका ब्लगर बोलाएर नेपालका विभिन्न पर्यटकीय क्षत्रको विभिन्न प्रचारका सामग्री बनाएर विश्वभर प्रचार गरिरहेका छौँ । त्यो प्रचार सामग्री अहिले बिबिसीमा पनि प्रचार भएको छ ।

नयाँ आर्थिक वर्षको योजना के छ ?

हामी आन्तरिक र विदेशी पर्यटक दुवैको विकासमा लागेका छौँ । हामीले हेरिरहेका छौैँ । सधैँ विदेशी पर्यटकको मात्र भर पर्न नहुने रहेछ । भूकम्प र भारतीय नाकाबन्दीले पनि हामीलाई पाठ सिकाएको छ । त्यसैले हामी आन्तरिक पर्यटनको पनि विकास गर्नुपर्छ भनेर सातवटै प्रदेशमा पर्यटन विकासमा लागेका छौँ । त्यसका लागि बजेट बनाउने काममा छौँ । हाम्रो अर्जुन दृष्टि प्रचारप्रसार र प्रवद्र्धन हो, हामी त्यसैमा लागेका छौँ ।

नेपालमा पर्यटनको पहिचान चैँ के हो ?

संसारका ठूला सातवटा हिमाल नेपालमै छन् । साहसिक पर्यटन नै नेपालको पहिचान हो । यसको प्रचारप्रसार नै हाम्रो पहिचान हो ।