दृष्टिविहीन पुरुष क्रिकेटमा बागमती विजयी
काठमाडौँ । नवौं क्षेत्रीय दृष्टिविहीन पुरुष क्रिकेट प्रतियोगिताको उपाधि बागमतीले जितेको छ । बिहीबार भएको खेलमा बाँकेलाई पाँच विकेटले पराजित गर्दै बागमतीले तीन टोली सम्मिलित प्रतियोगिताको उपाधि जितेको हो ।
पुल्चोकस्थित इन्जिनियरिङ कलेजको मैदानमा टस हारी पहिले ब्याटिङको पाएको बाँकेले १९दशमल ५ ओभरमा सबै विकेट गुमाउँदै ८५ रनको योगफल तयार गरेको थियो । जवाफमा बागमतीले १२ दशमल ३ ओभरमा मात्र पाँच विकेट गुमाउँदै लक्ष्य भेट्टाएको थियो ।
बागमतीको जितमा रमेशबहादुर बानियाँ र भेषबहादुर रानाभाटले समान १८–१८ रनको योगदान दिए । त्यसअघि बागमतीका श्याम ढुंगाना एक्लैले पाँच विकेट लिएपछि बाँके सानो योगफलमा समेटिन पुगेको थियो । आनन्द पाण्डे र कुशल न्यौपानेले पनि एक–एक विकेट लिएका थिए । बाँकेका लागि दुर्गादत्त पौडेलले सर्वाधिक ३२ रनको योगदान दिए पनि अन्य टोलीलाई विजयी बनाउन सकेनन् । बाँकेका लीलबहादुर चौधरीले तीन तथा दुर्गादत्त र यामजंग विष्टले बागमतीको एक–एक विकेट लिएका थिए ।
प्रतियोगितामा उत्कृष्ट प्रदर्शन गरेका श्याम ढुंगाना म्यान अफ दि सिरिज घोषित भए । उनले प्रतियोगिताभर आठ विकेट लिँदै १७ रन जोडेका थिए । कादुरी फाउन्डेसनको सहयोगमा सञ्चालित प्रतियोगितामा सहभागी तीनवटै टोलीलाई संघले प्रोत्साहनस्वरूप १०–१० हजार रुपैयाँ प्रदान गरेको छ ।
