इरानी फुटबल टोली अमेरिका पुग्यो
अमेरिका र इरानबीच युद्ध अन्त्य गर्ने सहमति घोषणा भएकै समयमा इरानको राष्ट्रिय फुटबल टोली विश्वकप प्रतियोगिताका लागि अमेरिकामा पुगेको छ ।
टोलीले लस एन्जलसमा अवतरण गरेको एक दिनपछि न्युजिल्यान्डविरुद्ध आफ्नो पहिलो खेल खेल्ने तालिका रहेको छ । बीबीसीका अनुसार अमेरिका–इरानबीचको युद्धविराम तथा तनाव अन्त्य गर्ने सहमति सार्वजनिक भएपछि थप सैन्य तनाव बढ्ने आशंका केही हदसम्म कम भएको छ । तर यसले इरानी टोलीलाई घेरेको राजनीतिक विवाद भने अन्त्य गर्न सकेको छैन ।
इरानी स्ट्राइकर मेहदी तारेमीले बीबीसीसँग कुरा गर्दै अमेरिका–इरानबीचको तनावले टोली अमेरिकामा पुगेको पहिलो दिनदेखि नै प्रतियोगितालाई प्रभावित बनाएको बताएका छन् । राजनीतिक परिस्थितिका कारण टोलीको तयारीसमेत प्रभावित भएको बीबीसीले जनाएको छ। भिसासम्बन्धी समस्याका कारण इरानी टोलीले आफ्नो विश्वकप प्रशिक्षण शिविर अमेरिकाबाट मेक्सिकोमा सार्न बाध्य भएको थियो ।
यसैबीच, लस एन्जलसमा बसोबास गर्ने ठूलो इरानी समुदायभित्र पनि टोलीप्रति मिश्रित प्रतिक्रिया देखिएको छ । कतिपय इरानी मूलका अमेरिकीहरू विश्व फुटबल महासंघ (फिफा) ले सन् १९७९ को इस्लामिक क्रान्तिअघिको ‘सिंह र सूर्य’ झण्डामाथि लगाएको प्रतिबन्धको विरोधमा प्रदर्शन गर्ने तयारीमा छन् । अन्य केहीले भने वर्तमान इरानी टोलीलाई आफूहरूले हटाउन चाहेको राजनीतिक व्यवस्थाको प्रतिनिधिका रूपमा हेरेका छन् ।
यद्यपि खेलाडीहरूले आफूहरू राजनीतिक विवादभन्दा माथि उठेर इरानी नागरिकहरूलाई एकताबद्ध गर्ने र फुटबलमा मात्र केन्द्रित हुने उद्देश्यका साथ प्रतियोगितामा सहभागी भएको बताएका छन् । तर यस पटकको इरानी टोलीका लागि राजनीतिबाट टाढा रहन सम्भव भएको छैन । मैदानभित्र खेलमा केन्द्रित रहने प्रयास गरे पनि मैदानबाहिरको भूराजनीतिक तनावले उनीहरूलाई निरन्तर पछ्याइरहेको छ ।
