विशेष महाधिवेशन बोलाउन हस्ताक्षर अभियानमा एमाले

हाम्रो इकोनोमि

 

 

 

नेकपा एमालेभित्र नेतृत्व र कार्यशैलीप्रति प्रश्न उठाउँदै विशेष महाधिवेशन बोलाउन हस्ताक्षर अभियान सुरू गरिएको छ । केपी ओलीलाई तेस्रोपटक अध्यक्ष बनाउँदै एमालेको ११औँ महाधिवेशन सकिएको साढे ३ महिनामात्र हुँदैछ । पार्टीको ११औँ राष्ट्रिय महाधिवेशनका प्रतिनिधिहरूले हालैको निर्वाचनमा पार्टीले व्यहोर्नुपरेको ऐतिहासिक पराजय र नेतृत्वप्रति जनताको अविश्वासलाई मुख्य कारण देखाउँदै हस्ताक्षर अभियान थालेका हुन् । केन्द्रीय कमिटी सदस्य, जनवर्गीय संगठनका पदाधिकारीसमेतको सहभागितामा थालिएको यो अभियानमा अहिलेसम्म ४४० जनाले हस्ताक्षर गरिसकेको दाबी गरिएको छ । अभियानमा सहभागी नेताले पदाधिकारीहरूको पनि साथ रहेको बताए । अध्यक्षलाई सम्बोधन गरेर तयार पारिँदै गरेको विशेष महाधिवेशनको मागपत्रमा २०४८ देखि २०८२ सम्मको संसदीय यात्रामा पार्टीले अहिले लज्जास्पद हार व्यहोरेको उल्लेख छ । प्रत्यक्षतर्फ १६५ मध्ये ९ सीटमा खुम्चिनु र समानुपातिकमा पनि उस्तै नतिजा आउनुले पार्टीको कमिटी प्रणाली र वर्तमान नेतृत्वप्रति जनताको अविश्वास देखिएको उनीहरूको भनाइ छ ।

विशेष महाधिवेशनको माग गर्ने पक्षक्षरले काठमाडौं उपत्यकाका १५ मध्ये ११ क्षेत्रमा एमाले उम्मेदवारको जमानत जफत हुनु र अधिकांश चर्चित र शीर्ष नेताहरू भारी मतान्तरले पराजित हुनु जनताको भावना अनुसार पार्टी नचल्नुको परिणाम भएको निचोड निकालेको छ । एमाले इतिहासको संगीन मोडमा आएको भन्दै मौजुदा कुनै कमिटीमा सामान्य समीक्षाले मात्र निकास नदिने एक नेताले बताए । एमालेको विधानअनुसार ठोस कार्यसूची र उचित कारण देखाएर बहुमत राष्ट्रिय महाधिवेशन प्रतिनिधि परिषद् सदस्यले लिखितरूपमा माग गरेको मितिले ६ महिनाभित्र केन्द्रीय कमिटीले विशेष महाधिवेशन आयोजना गर्नुपर्ने उल्लेख छ । यदि महाधिवेशन आयोजना नगरिए महाधिवेशन प्रतिनिधि परिषद् सदस्यले महाधिवेशन आयोजक कमिटी बनाएर विशेष महाधिवेशन आयोजना गर्न सक्ने वैधानिक व्यवस्था रहेको छ ।

दलको नेतामा सुहाङलाई रोकेर समयको बेग बुझ्न नसकेको पार्टी पङ्क्तिकै आलोचनालगत्तै ‘बादल प्रकरण’ एमालेको पछिल्लो संकटको पानीढलो बनेको छ । उनको अभिव्यक्तिलाई लिएर विष्णु पौडेलजस्ता नेता नै सार्वजनिक प्रतिवादमा उत्रिनुले अब एमालेमा नेतृत्व परिवर्तनको संघर्ष निर्णायक मोडमा पुगेको केही नेता बताउँछन् । ‘संसदमा बादलको विवादास्पद भनाइलाई सचिवालयले सच्याउने निर्णय गरेसँगै नेतृत्वको नैतिक धरातल सकिइसकेको छ एक पदाधिकारी बताउँछन् । बादललाई हिरासतबाट ओलीले दिएको कार्यवाहक अध्यक्षको जिम्मेवारीमाथि पनि ओली शंकर पक्षधर नेता नै असन्तुष्ट छन् । उक्त निर्णय सामूहिक छलफलबाट हुनसक्ने विषय पार्टीमा उठेको छ ।

महाधिवेशनको अन्तिम अन्तिम समयमा ओलीको पक्षमा खुलेका विष्णु पौडेल, पृथ्वीसुब्बा गुरुङलगायत ७ जना तत्कालीन पदाधिकारीकै कारण ईश्वर पोखरेल प्यानल पराजित भएको थियो । अहिले पौडेल स्वयं पनि अब ओलीको बिदाइको पक्षमा उभिएका छन् । निर्वाचन परिणामलगत्तै पौडेलले नीति र नेतृत्व पुनर्गठनको अभियान थालिने बताएका थिए । यसबीचमा ईश्वर पोखरेल पक्ष र विष्णु पौडेल पक्षबीच लगातार छलफल र बैठकहरू भइरहेका छन् । ओलीको सम्मानजक बिदाइका लागि पौडेल पक्षको साथ निर्णायक भएकाले पोखरेल पक्षले हात बढाएको छ । यसबीचमा ओलीमाथि राज्यले धरपकड गरेकाले नेतृत्व पुनर्गठनको प्रयास रोकिएको मात्र हो । सकेसम्म ओलीलाई राजीनामा गराउने र त्यसो नहुँदा विशेष महाधिवेशनको विकल्पमा एमाले पङ्क्ति पुगेको छ ।
फागुन २१ मा सम्पन्न प्रतिनिधिसभा सदस्यको निर्वाचन र त्यसअघिबाटै एमाले विभिन्न विरोधी कित्ताको तर्फबाट चौतर्फी घेराबन्दीमा थियो ।

‘बादल सुहाङ टकराव’ देखि पहिलो संसद बैठकसम्म आइपुग्दा त्यो घेराबन्दीले विरोधी वा इतरपक्षको ‘लक्ष्मणरेखा तोड्यो । पार्टी अध्यक्ष केपी शर्मा ओली र महासचिव शंकर पोखरेलकै ‘भित्रिया भनेर चिनिएकाहरु उनीहरूविरुद्ध खनिएका छन् । पार्टी नेतृत्वले निर्णय लादेर दलको नेता चयन गरेको आक्रोश पार्टीव्यापी छँदैछ । त्यसमाथि बादलको अभिव्यक्ति शैलीलाई लिएर टप टू बटमसम्मको असन्तुष्टिका स्वरले आगोमा घ्यू थपेको छ ।

एमालेभित्र ११ औँ महाधिवेशनअघि विद्या भण्डारी(ईश्वर पोखरेलहरूसँग नजिक भएका नेता–कार्यकर्ताको आलोचनालाई ‘मूल्य दिइँदैन थियो । तर पछिल्ला समयमा महाधिवेशनमा ओली शंकरको सूचीमा परेर पार्टी नेतृत्वमा पुगेका नेता नै आक्रोशित बनेका छन् । भित्रिया नै आक्रोशित भइरहेको यो दृश्यमा बरु तत्कालीन विद्या ईश्वरपक्षीय नेता कार्यकर्ता उति धेरै प्रकट भइरहेका छैनन् । हिजो ओली र शंकर पोखरेलले टिममा पारेकाहरुनै अब यो नेतृत्वबाट काम चल्दैन भन्दै खुलेआम विशेष महाधिवेशनसम्मको माग गर्न थालेका छन् ।

रास्वपाको अभूतपूर्व विजयमा नेपाली सेना,ब्युरोक्रेसी,सुशीला सरकार,कार्की आयोग,बारबरा फाउन्डेसनजस्ता संस्था तथा पात्रहरूको निर्णायक भूमिका रह्यो भन्दै गरेको बादलको दाबीले जनादेशलाई स्वीकार्न नसकेको रूपमा टिप्पणी भइरहेको छ । त्यसमा पनि संवेदनशील विषयमा बोल्दा सदनमा ख्याल गर्नुपर्ने भनेर बादलको आलोचना भइरहेको छ ।

उपाध्यक्ष विष्णु पौडेलले बादलको अभिव्यक्ति एमालेको मूल्य मान्यताविपरीत भएको प्रष्ट्याएका छन् । अर्का उपाध्यक्ष गोकर्ण विष्ट, उपमहासचिव योगेश भट्टराई, नेता सुरेन्द्र पाण्डेल, डा सूर्य पाठक लगायतले पनि सधैँ अरुलाई मात्र दोष दिएर नहुने आफ्नो पनि कमजोरी हेर्नुपर्ने भन्दै आपत्ति जनाएका छन् । यो घटना स्वयं केपी शर्मा ओली र शंकर पोखरेलका निम्ति ‘स्टप, लुक एण्ड गो को चरण हो । मिचेर वा पेलेर जाँदा गन्तव्य अनिश्चित छ । त्यसैले ‘ल्याम लाइट मा उभिएर ओली शंकरहरु एकछिन घोत्लिने बेला भइसक्यो ।