एमाले गुगलमा होईन भूगोलमा हुन्छ : महेश बस्नेत
नेकपा एमालेका सचिव एवं भक्तपुर क्षेत्र नं २ बाट प्रतिनिधि सभा सदस्य उम्मेदवार महेश बस्नेतले यो निर्वाचनमा नेकपा एमाले एकमना एकताका साथ आएको बताउनुभएको छ । नेकपा (एमाले) भक्तपुर क्षेत्र नं २ निर्वाचन परिचालन कमिटी अन्तर्गत सूर्यविनायक नगरपालिका वडा नं ७ गुण्डुको सम्पर्क कार्यालय उद्घाटन कार्यक्रममा बोल्दै उहाँले केही दिनमा बरालिएका युवाहरू पनि एमालेमा नै फर्कने बताउनुभयो । यो निर्वाचन मार्फत रवि लामिछाने र बालेनको पपुलिष्ट योजना परास्त हुने बस्नेतको दाबी छ । ‘गुगल नेटवर्कबाट आएको पार्टी गुगलमा नै हुन्छ, नेकपा एमाले भूगोलमा हुन्छ’, उहाँले भन्नुभयो ।
संविधान बचाउन र विकासको लागि नेकपा एमालेलाई नै जिताउनु पर्नेमा उहाँको भनाइ छ । ‘हामीले यस वर्ष नसोचेको भोट ल्याएर विजय हाँसिल गर्ने छौँ’, बस्नेतले भन्नुभयो । उहाँले राष्ट्र बचाउनको लागि पनि एमालेलाई मतदान गर्नुपर्ने बताउनुभयो । शान्तिपूर्ण देश नेपाललाई बचाउन युवाको महत्वपूर्ण भूमिका हुने बताउँदै देश बचानको लागि युवाले दायाँबायाँ नगरी एमालेलाई भोट हाल्नु पर्ने बस्नेतको धारणा छ । एमालेले मुलुकको विकास र समृद्धिको लागि मिसन २०८४ को अभियान लिएर आएको भए पनि असंवैधानिक तरिकाले संसद विघटन गरेर २०८२ सालमा नै चुनावमा जानु परेको उहाँले बताउनुभयो । यो चुनावमा एमालेले भाग नलिओस् र संसदलाई एमाले विहीन बनाउन सकिन्छ भन्ने षडयन्त्र गरिएको भए पनि त्यो सफल नभएको बस्नेतले बताउनुभयो ।
भदौ २३ र २४ को घटना आन्दोलन नभएका र त्यो नेपालीको चहना अनुसारको घटना नभएको उहाँले बताउनुभयो । २३ गते सुरुमा विद्यार्थीले देशको अवस्था परिवर्तनको लागि प्रदर्शन गरेका भए पनि पछि त्यसलाई हाइज्याक गरी हिंसात्मक बनाइएको उहाँले दाबी गर्नुभयो । उहाँले भदौ २३ र २४ को घटना सुनियोजित आक्रमणकारीबाट भएको बताउनुभयो । उनीहरूले लुटेर लैजान मिल्ने सामान जति सबै लगेका र लैजान नसक्ने सामान समेत घातक रसायन प्रयोग गरेर जगलाइएको उहाँले बताउनुभयो । यो ठुलो अन्तराष्ट्रिय डिजाइन अनुसारको योजना हो, यो कुनै आन्दोलन होइन’, उहाँले भन्नुभयो ।
