पार्टी भित्रको विकृति-विसङ्गति टुलुटुलु हेरेर बस्ने अवस्था छैन : पूर्वराष्ट्रपति भण्डारी
जेठ २२ मा विराटनगर उत्रिनासाथ पूर्वराष्ट्रपति विद्यादेवी भण्डारीले भनिन्- यस पटकको कोशी बसाइ अरू बेलाको भन्दा फरक छ । उनलाई स्वागत गर्न विमानस्थलमा पुगेका एमाले नेता तथा कार्यकर्ताका माझमा पत्रकारसँग संक्षिप्त कुरा गर्दै उनले थपिन्आ फ्नो भूगोलमा आउँदा नेता तथा कार्यकर्तालाई भेट्न पाउँदा त्यसै विशेष हुन्छ ।
विराटनगर महानगरपालिकाले आयोजना गरेको पालिका उपप्रमुखहरूको राष्ट्रिय भेला उद्घाटनको छेक पारेर विराटनगर आएकी थिइन् भण्डारी । यो बाहेक एमालेको कोशी प्रदेश विज्ञान तथा प्रविधि विभागले आयोजना गरेको विज्ञान तथा प्रविधि प्रदर्शनीको उद्घाटनका लागि उनी झापा पुगिन् ।
झापा र मोरङमा ५ रात बिताँउदा उनको अरू दुई कार्यक्रमको औपचारिक सेड्युअल बन्यो । झापामा नारी सञ्चार गृहको कार्यक्रममा सहभागिता जनाइन् भने मदन भण्डारीको घर भएको मोरङको इटहरामा फाउन्डेसनका अध्यक्ष राम ओलीको सक्रियतामा अर्को कार्यक्रम भयो । भण्डारी झापा र मोरङमा बस्दा मदन भण्डारी प्रतिष्ठानका सचिवको हिसाबले सोमराज थापाले भेट्न आउनेहरूका लागि समय र कार्य तालिका बनाएका थिए । उनी एमाले मोरङका सचिवसमेत हुन् ।
थापाका अनुसार झापामा दुई र विराटनगरमा तीन रात बसाइका क्रममा भण्डारीले ५ सयभन्दा बढी नेता तथा कार्यकर्तासँग अनौपचारिक भेटघाट भयो । उनलाई भेट्न आउने अधिकांश अनेमसंघका साथै पार्टीका र जनवर्गीय संगठनका नेता कार्यकर्ता थिए ।
विराटनगर र झापा बसाइका क्रममा भण्डारीलाई भेट्न आउने अधिकांश नेता तथा कार्यकर्ताहरूले पार्टीको सक्रिय राजनीतिमा आउन आग्रह गरेका छन् । भेटमा सबैका कुरा सुनेपछि उनी आफ्नो कुरा राख्थिन् ।झापामा उनलाई भेट्न पुगेका एक नेताले भण्डारी समक्ष भने पार्टीमा आन्तरिक लोकतन्त्र भन्ने नै रहेन । विकृति र विसङ्गति बढेर गयो । पार्टीको कमाण्ड सम्हाल्नुपर्यो । यो हामी सबैको माग र अनुरोध हो ।भण्डारीले भनिन्, पार्टी एकीकरण गरेर बलियो बनाउँदै राष्ट्रको समृद्धिको यात्रामा मेरो भूमिका सधैँ रहन्छ ।
भण्डारीनिकट एक नेताले भने, अधिकांश नेता तथा कार्यकर्ताहरूको गुनासो र निराशापछि भण्डारीले पार्टी भित्रको विकृति विसङ्गति टुलुटुलु हेरेर बस्ने अवस्था नरहेको बताउनुभयो । उहाँ सक्रिय राजनीतिमा आउने तयारीमा हुनुहुन्छ । झापा बसाइमा प्रतिनिधिसभा सदस्य एलपी साँवा, अनेमसंघका उपाध्यक्ष मेनका काफ्ले, अनेमसंघ स्थायी कमिटी सदस्य टिका घिमिरेले समेत भण्डारीसँग एमाले नेता तथा कार्यकर्ताको भेटघाटको समय मिलाएका थिए ।
