अमेरिकाको भर्जिनियामा पोखरीमा कार डुब्दा २ नेपालीको मृत्यु
अमेरिकाको भर्जिनियास्थित स्यान्टिली शहरमा भएको कार दुर्घटनामा दुई जना नेपालीको मृत्यु भएको छ । बिहीबार बिहान एक होटल परिसरको पोखरीमा कार डुब्दा ५५ वर्षीय कर्ण खड्का र २० वर्षीय निश्चल भट्टको ज्यान गएको फेयर फ्याक्स काउन्टी प्रहरीले पुष्टि गरेको छ । प्रहरीका अनुसार खड्काले चलाएको कार हिउँका कारण चिप्लिएर जमेको पोखरीमा खस्न पुगेको थियो । पोखरी गहिरो नभए पनि अत्यधिक चिसो पानी र उद्धारमा भएको ढिलाइका कारण दुवै जनाको मृत्यु भएको अनुमान गरिएको छ । मृतक खड्का सोही होटलमा कार्यरत थिए भने भट्ट रोजगारीको खोजीमा रहेका थिए । स्थानीय सुरक्षा अधिकारीहरूले यस स्थानमा यस्तो प्रकृतिको दुर्घटना हुनु असामान्य रहेको बताएका छन् । दुर्घटनाको थप अनुसन्धान भइरहेको काउन्टी प्रहरीले जनाएको छ ।
