बयान सकेर रविलाई पोखरा फर्काइयो
रुपन्देहीमा ३ दिनको बयान सकेर रास्वपा सभापति तथा पूर्वगृहमन्त्री रवि लामिछानेलाई आज पोखरा लगिएको छ । सुप्रिम बचत तथा ऋण सहकारी संस्था लिमिटेडबाट लामिछानेले ऋण लगि रकम अपचलन गरेको उनीमाथि आरोप थियो । बिहानैबाट हुस्सु लागेर मौसम खराबीका कारण भैरहवाको गौतमबुद्ध अन्तर्राष्ट्रिय विमानस्थल नखुलेकाले पौने ८ बजेको उडान साढे ५ घण्टा डिले भएको थियो । रुपन्देहीका प्रहरी प्रवक्ताले लामिछानेलाई विमानस्थल खुलेपछि पोखरा पठाइएको बताइन् । ‘हामीले सबै तयारी सकेका थियौं तर बिहानैदेखि विमानस्थल नखुलेकाले ढिलाई भयो’ उनले भनिन् । बिहीबार अन्तिम उडानमा पठाउन खोजिएपनि बयान सकिएपछि कागजपत्र मिलाउन ढिलाई भएकाले आजलाई सारिएको थियो । उनलाई यती एयरमार्फत पोखरा पठाइएको हो । रविलाई आज नै लैजाने पक्का भएपछि उनको सचिवालय तथा पार्टीका अन्य नेता-कार्यकर्ता पोखरा पुगिसकेका छन् ।
