श्रीमानद्वारा श्रीमतीको गोली हानी हत्या
सर्लाहीको हरिपूर्वा नगरपालिका-५ मा एक युवकले आफ्नी श्रीमतीको गोली हानेर हत्या गरेका छन् । घटनामा युवकका बुवा पनि गोली लागेर घाइते भएका छन् । जिल्ला प्रहरी कार्यालय सर्लाहीकाअनुसार २७ वर्षीय धीरेन्द्र यादवले गएराति आफ्नी २३ वर्षीया श्रीमती चित्रलेखा यादवलाई गोली प्रहार गरी हत्या गरेका हुन् । कार्यालयका डीएसपी दीपक श्रेष्ठले दिएको जानकारीअनुसार चित्रलेखाको टाउको र आँखामा दुई गोली लागेको र घटनास्थलमै उहाँको मृत्यु भएको थियो । घटनामा धीरेन्द्रका ५४ वर्षीय बुबा रामदिनेश घाइते हुनुभएको छ । उहाँको कुहिनोमा गोली लागेको छ । प्रहरीकाअनुसार बुहारीलाई गोली प्रहार हुन थालेपछि छुट्याउने क्रममा उहाँलाई पनि गोली लागेको हुनसक्ने अनुमान गरिएको छ । घाइते रामदिनेशको प्रादेशिक अस्पताल मलंगवामा उपचार भइरहेको डीएसपी श्रेष्ठले बताउनुभयो । प्रहरीले दिएको जानकारीअनुसार आरोपी धीरेन्द्र केही समयअघि मात्र वैदेशिक रोजगारी (कुवेत)बाट फर्किएका थिए । गोली प्रहार गरी फरार रहेका धीरेन्द्रको खोजी कार्य जारी रहेको प्रहरीले जनाएको छ ।
