एमाले सरकार फेर्ने खेलमा छैन : ओली

 

प्रमुख प्रतिपक्षी दल नेकपा (एमाले) का अध्यक्ष केपी शर्मा ओलीले सरकार फेर्ने खेलमा एमाले नरहेको बताउनुभएको छ । विराटनगर विमानस्थलमा बुधबार सञ्चारकर्मीहरुसँग कुराकानी गर्नुहुँदै उहाँले अहिलेको सरकार फेर्ने, गठबन्धन बदल्ने जस्तो खेलमा एमाले नरहेको बताउनुभएको हो । उहाँले भन्नुभयो,‘हामी मिसन ८४ मा केन्द्रित छौं । मुलुकको विकास गर्नुपर्ने, राष्ट्रियता, सुशासन, विकास कमजोर भएका छन् । जनतामा रहेको निराशालाई आशामा बदल्नु छ । प्रतिपक्षमा रहेको अवस्थामा हामीले गठबन्धन सरकारलाई सुझाव दिँदै आएका छौं । तर गठबन्धनले सुनिरहेको छैन ।’

अध्यक्ष ओलीले नेपाली कांग्रेस सरकार सत्ता टिकाउन लालायित रहेको आरोप समेत लगाउनुभएको हो । ‘कांग्रेस अब पुरानो अवस्थामा रहेन । पहिलेको जस्तो छैन । थोत्रो भएको छ काँग्रेस,’उहाँले भन्नुभयो ।कांग्रेसले संविधान संशोधनको विषयअघि बढाउनुलाई उहाँले ब्लाइन्ड फायर’ गरेको रुपमा लिएको धारणा व्यक्त गर्नुभयो । ‘संविधान संशोधन गर्नका लागि परिस्थितिलाई सम्भव बनाउने गरी विषयगत मुद्दा चाहियो । ८७ सिटको कांग्रेसले संशोधन पूरा गर्छ ?’अध्यक्ष ओलीले प्रश्न गर्नुभयो । कांग्रेस प्रतिगामी सोचका साथ अघि बढिरहेको उहाँको भनाइ छ ।

संविधान संशोधन गर्न अघि बढेको कांग्रेसले आफ्नो हैसियत बिर्सिएको उहाँले टिप्पणी गर्नुभयो । यसैगरी ओलीले अर्को प्रसंगमा जनताको मृत्युको कारण देखिएका मन्त्रीले राजीनामा दिएर नैतिकता देखाउनुपर्ने स्पष्ट पार्नुभयो । मन्त्रीका कारण जनताको मृत्यु भएको अवस्थामा राजीनामा दिनुपर्ने उहाँले बताउनुभयो ।