मैले कसैलाई ह्यारेसमेन्ट गरेको छैन : कृष्ण कँडेल

 

 

इन्द्रेणीका सञ्चालक कृष्ण कँडेलले आफूमाथि लगाइएका आरोपबारे पत्रकार सम्मेलनमार्फत जवाफ दिएका छन् । उनले कुनै पनि कलाकारमाथि शोषण र दुर्व्यवहार नगरेको बताए । इन्द्रेणीबाट हटाइएका ६ जना कलाकारले आफूहरूलाई अन्यायमा पारिएको भन्दै कँडेलविरुद्ध पत्रकार सम्मेलन गरेका थिए । उनीहरूमध्ये शर्मिला श्रेष्ठले आफूमाथि कँडेलले ‘ह्यारेसमेन्ट’ गरेको आरोप पनि लगाएकी छन् । कँडेल आफ्नो कोठामा जान खोजेको तर आफूले नलगेपछि काममा पेल्न थालेको उनको आरोप छ ।

इन्द्रेणीको टीमसहित उपस्थित भएका कँडेलले आफूमाथि लागेका अधिकांश आरोप इन्कार गरे । युट्यूवका क्यामराहरूको भिडबीच उनी भावुकता र आवेशमिश्रित मनोदशामा प्रस्तुत भएका थिए । खासगरी शर्मिलाले लगाएको ‘ह्यारेसमेन्ट’ आरोपमा उनको आक्रोश थियो । उनले शर्मिलालाई ‘आफूले ह्यारेसमेन्ट गरेको भए अहिलेसम्म किन मौन बसेको ?’ भन्दै प्रश्न गरे ।

कँडेलले भने, ‘अहिले जसलाई जे-जे भने पनि हुने भयो यो देशमा । शर्मिला बहिनी ! यदि मैले तपाईंलाई ह्यारेसमेन्ट गरेको थिएँ भने तीन वर्ष के हेर्नुभयो भन्नुस् त ? म विदेश जाँदा तपाईं एयरपोर्टमा आएर ‘भगवान् दाइ’ भन्दै ढोग गर्नुभएको थियो । अहिले राक्षस भन्ने हो भने त्यो बेला किन भगवान् भन्नुभयो ? त्यही बेला मलाई तैंले किन यसो गरिस् भन्नु पर्दैन ?

सबै कर्मचारीको कोठामा जाने गरेको आरोपलाई उनले आंशिक स्वीकार गरे । कँडेलले भने, ‘परेको बेलामा काम विशेषले साथीभाइको कोठामा गइयो होला । गइन्छ पनि । त्यसैलाई लिएर ह्यारेसमेन्ट भन्न मिल्छ ?’ आर्थिक कारणले इन्द्रेणीमा कार्यरत कर्मचारीहरुलाई स्थायीरूपमा राख्न नसक्ने भएपछि नयाँ करार गरेको कँडेलले बताए । त्यसैअनुसार आन्तरिक विधान बनाएको र वकिल राखेर सबैलाई हस्ताक्षर गराएको उनको भनाइ छ ।

‘कार्यक्रम भएको बेलामा बोलाउने भनेर सबैलाई एउटै व्यहोरामा सही गराइएको हो, उहाँहरूलाई मात्र होइन,’ कँडेलले भने । १० वर्षमा घर बनाइदिने आश्वासन आफूले नदिएको उनले बताए । ‘इन्द्रेणी त जग्गा लिजमा लिएर चलाइरहेको छु । ५ वर्षपछि के हुने हो टुंगो छैन । मैले कसरी अरुको घर बनाइदिने ठेक्का लिन सक्छु ?’ कँडेलले प्रश्न गरे । इन्द्रेणीका गाडी चालककी पत्नीलाई ४ लाख रूपैयाँ दिएको आरोप भने कँडेलले स्वीकार गरेका थिए । उक्त पैसा केका लागि दिइएको भन्ने उनले ठोस जवाफ दिन सकेनन् । आर्थिक पारदर्शीताको विषयमा उठेको प्रश्नमा कँडेलले सबै आयव्ययको लेखापरीक्षण हुने गरेको भनेर पन्छिए ।

कर्मचारीहरूलाई कुटपिट गरिएको आरोप कँडेलले आंशिक स्वीकार गरे । आफूविरुद्ध गालीगालौज र ज्यानकै धम्की दिइएपछि आफ्ना भाइभतिजाले धकेलाधकेल गरेको उनले बताए  ‘उनीहरूले ममाथि नचाहिँदा आरोप लगाएर आक्रामकरूपमा पेश भएपछि मेरा मान्छेहरू पनि आक्रोशित हुनु स्वाभाविक हो । अलिकति धकेलाधकेल गरेका हुन्,’ कँडेलले भने, ‘त्यस्तो कुटपिट नभै भएको थियो भने त वकिल साब त्यही हुनुहुन्थ्यो, प्रहरीको हवल्दार हुनुहुन्थ्यो । त्यही दिन किन उजुरबाजुर गरिएन ?’