राजनीतिक दल नयाँ र पुराना हुँदैनन् : शंकर पोखरेल
नेकपा एमालेका महासचिव शंकर पोखरेलले दर्ता नम्बरका आधारमा कुनै पनि राजनीतिक दल नयाँ वा पुरानो नहुने बताएका छन् । मुलुकमा नयाँ र पुरानो पार्टी भनेर नयाँ भाष्य निर्माण गर्न खोजिनु पूर्णत: गलत भएको बताउँदै उनले दल नयाँ हुन समय अनुसार विचार, नीति र नेतृत्वको रुपान्तरण हुनुपर्ने बताएका छन् । नेकपा एमाले जनसंगठन समन्वय संयन्त्रको १२औँ बैठकलाई सम्बोधन गर्दै उनले कुनै पनि राजनीतिक दलले अवलम्बन गर्ने नीति र नेतृत्वले दलको क्रियाशीलता र रुपान्तरणलाई निर्धारण गर्ने हुँदा नयाँ दल दर्ता हुँदैमा अरु पुरानो नहुने बताएका हुन् । अमेरिकामा समेत दुई वटा ठूला र पुराना दल रहेको र तिनलाई कहिल्यै पुरानो नभनिएको स्मरण गराउँदै महासचिव पोखरेलले हरेक पाँच–पाँच वर्षमा नेतृत्व परिवर्तन र नीति समयानुकुल बनाइरहेका नेकपा एमालेलगायत दलहरू कहिल्यै पुरानो नहुने विचार व्यक्त गरे । वैकल्पिक शक्तिहरूलाई सही ढंगले बुझ्नुपर्ने उनको भनाइ छ ।
यस्तै, उनले देश बनाउने अभिभारा जनताले मत दिएर पठाएका जनप्रतिनिधिका साथै सम्पूर्ण नेपालीको पनि भएको चर्चा गर्दै अब जनसंगठनहरूले आफ्ना गतिविधिलाई व्यवस्थित रूपमा जनताको बीचमा लगेर जनताको मन जित्नुपर्ने बताएका छन् । संयन्त्रका प्रमुख भानुभक्त ढकालको अध्यक्षतामा बसेको बैठकलाई पार्टीका अध्यक्ष केपी शर्मा ओली र महासचिव शंकर पोखरेलले सम्बोधन गरेका थिए । पोलिटव्युरो सदस्य महेश बस्नेतले स्वागत गरेको बैठकलाई केन्द्रीय सदस्य रचना खड्काले सहजीकरण गरेकी थिइन् । बैठकमा संगठन विभाग प्रमुख काशीनाथ अधिकारी, प्रचार तथा प्रकाशन विभाग प्रमुख समेत रहेका स्थायी कमिटी सदस्य राजेन्द्र गौतमसहित कृष्णगोपाल श्रेष्ठ, कर्ण थापा, सीता पौडेल लगायत सहभागी थिए । बैठकमा सबै जनसंगठनका इञ्चार्ज, अध्यक्ष र पार्टीका तर्फबाट प्रदेशमा जनसंगठनको संयोजक तोकिनुभएका केन्द्रीय सदस्यहरूको सहभागिता रहेको बताइएको छ ।
