शेरबहादुर देउवाले देखाइदिए गगनको औकात
फेसबुकलगायत सामाजिक सन्जाल र केही खास सञ्चारमाध्यमबाट उचालिएका काङ्ग्रेस महामन्त्री गगन थापालाई सभापति शेरबहादुर देउवाले आफ्नो वास्तविक औकात देखाइदिएका छन् । संसदीय निर्वाचनको समयमा आफूलाई भावी प्रधानमन्त्रीको रूपमा प्रचार गराएका गगनले आफ्नै समूहका नेता डा. शेखर कोइरालालाई उछिनेर आफै संसदीय दलको नेता बन्न अग्रसर भएका थिए । त्यसबेला गगनको महत्वाकाङ्क्षा उर्लिएको ठानिएको थियो । त्यसयता गगनले सभापति शेरबहादुर देउवाविरूद्ध जोडदार अभियान चलाउँदै आएका थिए । उनले देउवालाई नेतृत्वबाट पन्छाउन पार्टीभित्र गुटबन्दी गर्दै आएका थिए ।
गत साता भएको काङ्ग्रेस केन्द्रीय समितिको बैठकलाई लाइभ (प्रत्यक्ष प्रशारण) गरेर देउवाले काङ्ग्रेसका सबै केन्द्रीय नेताहरूको क्षमता, योग्यता र औकात देखाइदिए । त्यसमा पनि निकै चर्का कुरा गर्ने गगन यसपटक ज्यादै नराम्रोसँग एक्स्पोज भएका छन् । पार्टीका केन्द्रीय सदस्यहरूमध्ये अधिकाङ्शले महामन्त्रीको भूमिकाप्रति गम्भीर आपत्ति जनाएका थिए । कतिपय सदस्यले महामन्त्रीहरूले गुटबन्दी गरेर पार्टीमा अराजकता निम्त्याएको भन्दै औकातमा नबसे महामन्त्रीको विकल्प खोज्न बाध्य हुने चेतावनी दिएका छन् । बाहिर चर्का कुरा गर्ने महामन्त्रीहरू बैठकमा निरीह र रक्षात्मक बन्नुपरेको थियो ।यस बैठकले सभापति शेरबहादुर देउवालाई उर्जा थप्नुको साथै काङ्ग्रेसमा कृत्रिम ढङ्गले सिर्जना गर्न खोजिएको विवाद मत्थर हुने सम्भावना बढाएको छ । र, अब गगनले अराजक व्यवहार गर्न नसक्ने परिस्थिति सिर्जना गरिदिएको छ ।
