तीन दलका शीर्ष नेताबीच जुट्यो २ सहमति
प्रमुख तीन संसदीय समितिका सभापति चयन गर्ने सहमति भएको छ । सभामुख देवराज घिमिरेको आयोजनामा आज सिंहदरवारमा भएको बैठकमा प्रमुख दलका नेताहरुबीच यस्तो सहमति भएको हो । सिंहदरबारस्थित सभामुखको कार्यकक्षमा बसेको बैठकमा संसदीय समितिका सभापति छिटोभन्दा छिटो चयन गर्ने सहमति भएको कानूनमन्त्री धनराज गुरुङले जानकारी दिनुभयो । ‘लामो समयदेखि समितिको सभापति चयन हुन सकेको छैन । अब छिटोभन्दा छिटो चयन गर्ने भन्ने पूर्ण रूपमा सहमति भएको छ,’ मन्त्री गुरुङले भन्नुभयो । उहाँले पूर्व सहमतिअनुसार नै समितिको सभापति चयन हुने सहमति जुटेको जानकारी दिनुभयो ।
वैशाख १५ गते प्रतिनिधि सभाका १० वटा विषयगत समिति गठन भएको थियो । समिति गठन भएको दुई सातापछि जेठ २ गते एक साथ १० वटै समितिको बैठक सुरू भएको थियो । तर, सभापति चयन हुन नसक्दा समितिहरूले विधेयकमाथि छलफल गर्न सकेका छैनन । आजको बैठकमा राजनीतिमा देखिएको अराजकतालाई अन्त्य गरेर अघि बढने सहमतिसमेत भएको छ । मन्त्री गुरुङका अनुसार तीन दलका शीर्ष नेताले अराजकताको अन्त्य गरी संघीय लोकतान्त्रिक गणतन्त्रलाई बलियो बनाएर जानुपर्छ भन्ने निश्कर्षमा पुग्नुभएको हो । सभामुख घिमिरेले आज प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्ड, प्रमुख प्रतिपक्षी दलका नेता एमाले अध्यक्ष केपी शर्मा ओली र नेपाली कांग्रेसका सभापति शेरबहादुर देउवा र उपसभापति तथा कानूनमन्त्री गुरुङको बैठक राख्नुभएको हो ।
