नीति तथा कार्यक्रम पुनर्लेखन गर्न राजेन्द्र लिङ्देनको माग
राष्ट्रिय प्रजातन्त्र पार्टीका अध्यक्ष राजेन्द्र लिङ्देनले सरकारको नीति तथा कार्यक्रमले आगामी प्राथमिकता तय गर्न नसकेको बताएका छन् । सोमबार संसदको बैठकमा सरकारको नीति तथा कार्यक्रममाथिको छलफलका क्रममा लिङ्देनले नीति तथा कार्यक्रमले वर्तमान आर्थिक संकटको योजना ल्याउन नसकेको र आगामी प्राथमिकता तय गर्न नसकेको भन्दै पुनर्लेखन गरेर ल्याउन सुझाव दिए ।
उनले नीति तथा कार्यक्रममा जनयुद्ध शब्द राखेर आत्मरतीमा रमाउँदा त्यसले केही फरक नपर्ने भन्दै देश र जनतामा फरक पार्ने कार्यक्रम आउनुपर्ने धारणा राखे । मुलुकको अवस्था सामान्य नरहेको र देशले आर्थिक संकट भोगिरहेको अवस्थामा यसको समाधानका उपायसहितको कार्यक्रम आउनुपर्ने धारणा उनको छ । यस्तै लिङ्देनले सरकारको कार्यक्रममा समावेश केही बिषयहरुको पनि कार्यान्वयनको अवस्थामा प्रश्नचिन्ह खडा भएको बताए । रबिन्द्र कुमार मगर
