गृहमन्त्री बनाउन प्रचण्ड तयार भएपनि रवि सरकारमा नजाने



 

 

रवि लामिछाने नेतृत्वको राष्ट्रिय स्वतन्त्र पार्टीले प्रचण्ड नेतृत्वको सरकारलाई दिएको समर्थन जारी राख्ने सम्भावना क्षीण बनेको छ । भोलि हुने केन्द्रीय समिति बैठकले सरकारलाई दिएको समर्थन फिर्ता लिँदै प्रतिपक्षमा बस्ने औपचारिक निर्णय लिन सक्छ । गत सोमबार बसेको केन्द्रीय समिति बैठकले अहिलेको मझधारबाट निस्केर कि सरकारमा जाने कि प्रतिपक्षमा बस्ने निधो गरेको थियो । यी दुईमध्ये एउटा विकल्प रोज्न भोलि बैठक बोलाइएको हो । पार्टी स्रोतका अनुसार सरकारमा जानेभन्दा प्रतिपक्षमा बस्ने निर्णय लिने सम्भावना धेरै बलियो छ ।

चितवन-२ मा अभुतपूर्व जनलहरसहित उपचुनाव जितेपछि रास्वपा सभापति लामिछाने नेपाली राजनीतिमा कसैले ‘इग्नोर’ गर्न नसक्नेगरी प्रभावशाली देखिएका छन् । उपचुनावअघिसम्म रास्वपालाई खासै भाउ नदिएका प्रधानमन्त्री पुष्पकमल दाहाल ‘प्रचण्ड’ अहिले लामिछानेलाई सरकारमा फर्काउन मरिहत्ते गरिरहेका छन् । उपचुनावलगत्तै लामिछानेले सरकारलाई दिएको समर्थन फिर्ता लिने संकेत गरेका थिए । चितवनमै उनले ‘सरकारलाई समर्थन जारी राख्नुपर्ने कुनै कारण नरहेको’ भाषण गरेपछि प्रचण्डले आत्तिदै फोन गरे । फोनमा पनि रविले त्यही भाव व्यक्त गरे, जुन भाषणमा गरेका थिए ।

रवि काठमाडौं आएपछि प्रचण्डले उनलाई बालुवाटारमै भेट्न बोलाए । जितका लागि बधाई दिँदै सरकारमा फर्किन औपचारिक प्रस्ताव गरे । रास्वपालाई मन्त्रीपरिषदमा पहिलेकै हैसियत दिने आश्वासन पनि दिए । रविलाई नै फेरि उपप्रधानमन्त्री र गृहमन्त्री बनाउन तयार रहेको बताए । तर, पनि रविले सरकारमा आउन खासै इन्ट्रेस्ट देखाएनन् । स्रोतका अनुसार उनले सरकारमा आउँदा आफूहरूले पाउने मन्त्रालयहरूबारे चासो भने राखेका थिए । बालुवाटार स्रोत भन्छ, ‘उहाँले मन्त्रालयहरूबारे चासो राखे पनि सरकारमा आउन ग्रीन सिग्नल दिनुभएन । यद्यपि, प्रधानमन्त्रीज्यू अझै प्रयासरत हुनुहुन्छ ।’ पछिल्लोपटक रास्वपाले गृहसहित अर्थ मन्त्रालय पनि मागेको प्रधानमन्त्रीनिकट स्रोत बताउँछ । ‘रवि लामिछानेलाई गृह र डा. स्वर्णिम वाग्लेलाई अर्थमन्त्री बनाउँदा जनतामा राम्रो सन्देश जाने र आफूहरूले पनि काम गरेर देखाउनसक्ने कुरा उहाँहरूबाट आएको हो । तर, यो चाहीँ पूरा गर्न कठिन छ,’ स्रोतले भन्यो ।

अहिले गृहमन्त्रालयमा माओवादीका सेकेन्डम्यान नारायणकाजी श्रेष्ठ र अर्थ मन्त्रालयमा कांग्रेस सभापति शेरबहादुर देउवाका विश्वासपात्र डा. प्रकाशशरण महत छन् । रास्वपा सरकारमा आउने शर्तमा नारायणकाजीलाई फेरि अर्को मन्त्रालयमा सरुवा गर्न प्रधानमन्त्री तयार छन् । तर, बजेटको मुखमा प्रकाशशरणलाई अर्थबाट झिक्न देउवा तयार छैनन् । फेरि गृह र अर्थजस्ता सबैभन्दा महत्वपूर्ण दुवै मन्त्रालय रास्वपालाई सुम्पन माओवादी र कांग्रेसले मान्ने स्थिति देखिँदैन ।

त्यसो त रास्वपा सरकारमै सहभागी भएर ‘पर्फमेन्स’ देखाउन चाहन्छ । कामकाजी मन्त्रालयहरूसहित सरकारमा नजाँदासम्म आफूहरूलाई प्रमाणित गर्न सकिँदैन भन्नेमा रवि लामिछाने स्पष्ट छन् । यसका बाबजुद पनि प्रचण्ड सरकारमा फर्किन किन अनिच्छुक भए त उनी ? यसका दुई कारण छन् । पहिलो सरकारको आयूमा विश्वस्त हुन नसक्नु र दोस्रो सरकार अलोकप्रिय बन्दै जानु । पार्टीको उच्च स्रोत भन्छ, ‘हामी राजनीतिक अस्थिरताको पक्षमा छैनौं । तर, यो सरकार टिकाउ हुन्छ भन्ने आधारहरू देखिएनन् । भविष्यलाई हेरेर दूरदर्शी निर्णय लिन खोजिएको हो ।’

गणीतीय हिसाबले हेर्ने हो भने प्रचण्ड सरकारसँग अहिले प्रचण्ड बहुमत छ । सरकार गठनका लागि १३८ जनाको समर्थन चाहिनेमा अहिले रास्वपा सहित १८० आसपासमा सांसदहरूले समर्थन जनाएका छन् । यो भनेको आरामदायी अवस्था हुनुपर्ने हो । तर, पनि किन सरकारको भविष्य देखिरहेको छैन त रास्वपा ? स्रोतका अनुसार गठबन्धनको सबैभन्दा ठूलो दल कांग्रेसले प्रचण्ड सरकारलाई लामो समय बोकेर हिँडिरहँदैन भन्ने पार्टी नेतृत्वको विश्लेषण छ । अहिले नै दुई पार्टीबीच गम्भीर असमझदारीहरू देखिन थालिसकेको तथा कांग्रेस सभापति शेरबहादुर देउवामा फेरि प्रधानमन्त्री बन्ने तृष्णा जागिसकेको रास्वपाका नेताहरूले अनुमान लगाएका छन् ।

रवि लामिछाने स्वयम्‌ले देउवालाई तीन दिनअघि भेटेर उनको नाडी छामेका थिए । उक्त भेटमा देउवाले रास्वपालाई ‘अहिले सरकारमा सहभागी हुन’ सुझाव दिएको स्रोत बताउँछ । अहिले सरकारमा आउँदै गर्नुस् । भविष्यमा तलमाथि केही भयो भने फेरि अर्को तरिकाले मिलेर जान सकिहालिन्छ,’ लामिछानेलाई देउवाको सुझाव थियो ।

एमाले फ्याक्टर

यता, प्रतिपक्षमा रहेको एमाले कसरी प्रचण्ड सरकारमाथि धावा बोल्न सकिन्छ भनेर गौंडो ढुकेर बसिरहेको छ । प्रचण्डबाट ऐतिहासिक धोका पाएका एमाले अध्यक्ष केपी ओली बदलाभावले बेचैन छन् । ओलीको बदलाभाव र देउवाको तृष्णाबीच मिलनबिन्दु भेटिनासाथ सरकार धरापमा पर्ने अवस्था छ । प्रचण्डलाई साटो फेर्नका लागि एमालेले देउवालाई नै प्रधानमन्त्रीमा प्रस्ताव गरेर नयाँ गठवन्धनको पहल गर्न सक्छ । सरकारको भविष्यमा रवि सशंकित हुनुको मुख्य आधार यही हो ।

उपचुनाव जितेर फर्किएपछि रवि र ओलीबीच बालकोटमा भेटवार्ता भएको थियो । सो भेटवार्तामा ओलीले नयाँ गठबन्धनका लागि प्रस्ताव गरेका थिए । सकेसम्म कांग्रेससहितको र त्यो सम्भव नभए कांग्रेस-माओवादी र नेकपा एसबाहेकको गठबन्धन बनाएर सरकार ढाल्ने मार्गचित्र ओलीले प्रस्तुत गरेका छन् ।

एमाले स्रोतको दाबीअनुसार ओलीको प्रस्तावमा रवि सकारात्मक देखिएका थिए । विगतमा आफूलाई सरकारमा सहभागी गराएर गृहमन्त्रालय दिलाएको, नागरिकता-पासपोर्ट प्रकरणमा संसदमै आफ्नो बचाउमा बोलेको, दोस्रोपटक गृहमा फर्काउन प्रयास गरेकोलगायत कारणले लामिछाने ओलीप्रति अनुग्रहित छन् । सैद्धान्तिक आधारमा पनि माओवादीभन्दा एमालेसँगको सहकार्य आफ्नो पार्टीका लागि बढी अनुकूल हुने उनको ठम्याइ छ । ओलीले लामिछानेलाई प्रधानमन्त्री पदकै अफर गरेको समाचारहरू पनि मिडियामा आएका छन् । तर, रास्वपाका एक नेताका अनुसार यो अफर ओलीले अहिले गरेका होइनन् ।

‘हामी सरकारमै छँदा चाहीँ यस्तो प्रस्ताव आएको थियो । त्यसबेला स्वीकार गर्न सकिएन । अहिले चाहीँ मिलेर जाने कुरामात्रै भएको छ, अरु कुरा भविष्यले नै बताउँछ,’ ती नेताले भने । त्यसो त वर्तमान सरकारको पाँच वर्षे कार्यकालभित्र एकपटक कसैगरी प्रधानमन्त्री बन्नसक्नेमा रवि आशावादी देखिन थालेका छन् । संसदको तेस्रो शक्तिले सरकारको नेतृत्व गरिरहेको छ भने भोलि राजनीतिक जोडघटाउ मिलाउन सकेमा चौंथो शक्तिको पनि पालो आउँछ भन्ने उनको बुझाइ हो । पाँचै वर्ष प्रतिपक्षमा बसिरहने मनस्थिति उनको छैन ।

‘हामीले जनतासमक्ष गरेका वाचाहरू पूरा गर्नका लागि पनि सरकारमै जानुपर्छ,’ रविनिकट एक नेताले भने, ‘प्रतिपक्षमा बसेर त संसदमा गर्जिने बाहेक अरु के गर्न सकिन्छ र ?’ रास्वपा र एमाले मिलेर वर्तमान सरकारलाई अप्ठ्यारोमा पार्न सक्ने सूचना प्रधानमन्त्री प्रचण्डसम्म पुगिसकेको छ । हिजो बालुवाटारमा बसेको सत्ता गठबन्धनको बैठकमा यस विषयमा चर्चा भएको थियो । बैठकमा सबैजसो नेताहरूले रास्वपालाई सरकारमा ल्याउनुपर्नेमा जोड दिए । तर, रास्वपाले भने अर्कै बाटो लिन सक्ने भनेर प्रचण्ड चिन्तामा परेका छन् ।

प्रतिक्रिया दिनुहोस
अमेरिकाले दिएन सन्दीप लामिछानेलाई भिसा

  विश्वकप खेल्न अमेरिका जान लागेका नेपाली क्रिकेटर सन्दीप लामिछानेलाई काठमाडौंस्थित अमेरिकी दूतावासले

सहकारी बचतकर्ताको तेस्रो चरणको आन्दोलन घोषणा

    सहकारी बचतकर्ता संरक्षण राष्ट्रिय अभियान महासंघले तेस्रो चरणको आन्दोलन घोषणा गरेको

होटल सरोवर र किङ्गस लाउन्ज पोखरामा प्रभु बैंकको विशेष छुट

        पर्यटकीय सदरमुकाम पोखरा को लेकसाइडमा अवस्थित होटल सरोवर प्रा.लि

बहुचर्चित बहुलोकप्रिय माइडिया ब्रान्डको डिशवाशर नेपालमा

    वर्ल्ड नम्बरवान अप्लाईन्स प्रोडुसर माइडियाको आधिकारिक बिक्रेता सीजी इलेक्ट्रोनिक्सले आधुनिक  बिएलडिसी