समाजलाई अतिवादतिर लैजाने शक्तिहरूको चलखेल बढ्यो : महासचिव पोखरेल
कपा एमालेका महासचिव शंकर पोखरेलले नेपाली समाज अस्थिरता र अराजकतातर्फ गइरहेको भन्दै गम्भीर चिन्ता जनाउनु भएको छ । आइतबार काठमाडौंमा सहिद यदुनाथ गौतमको स्मृतिमा आयोजित एक कार्यक्रममा बोल्दै महासचिव पोखरेलले यस्तो चिन्ता ब्यक्त गर्नुभएको हो । उहाँले धर्म र राजनीतिलाई जोड्ने र समाजलाई अतिवादतिर लैजाने शक्तिहरूको चलखेल बढिरहेको बताउनु भयो । महासचिव पोखरेलले त्यस्ता सामाजिक चुनौतीहरूविरुद्ध लड्नका लागि बलियो शक्तिको खाँचो रहेको तथ्यसमेत र्आलयाउनु भएको छ ।
‘अहिले हाम्रो समाजमा सामाजिक असुरक्षाको वातावरण बनेको छ, समाजलाई जबर्जस्ती गलत बाटोमा लैजाने शक्तिहरू हाबी भइरहेका छन,’ महासचिव पोखरेलले भन्नुभयो, ‘समाजमा अस्थिरता र अराजकताको चुनौती यसरी बढेको छ कि एकातिर सांस्कृतिक अतिवाद छ, जसले राजनीति र धर्मलाई जोड्ने प्रयास गरिरहेको छ । अर्कोतिर धर्मान्तरको प्रवृत्ति बढेको छ । जसले नेपालको मौलिक संस्कृतिलाई तहसनहस बनाइरहेको छ ।’ महासचिव पोखरेलले नेपाली सांस्कृतिक मूल्य र मान्यतामाथिको आक्रमण बढ्दो रहेको पनि बताउनु भयो । देशमा आर्थिक संकट अर्को ठूलो समस्याका रुपमा रहेको उहाँको भनाई छ ।
‘देश आर्थिकरुपमा चरम संकटतर्फ उन्मुख छ । नयाँ सरकार बनेपछि अर्थतन्त्रलाई संकटबाट बाहिर ल्याउन केही प्रयासहरु भएका थिए । तर फेरि समीकरण फेरिएको अवस्था छ,’ पोखरेलले भन्नुभयो, ‘फेरि आशा गर्ने ठाउँहरू पछि धकेलिएका छन । हामी यी सबै समस्यासँग जुध्नका लागि बलियो राष्ट्रिय शक्ति निर्माण गर्न चाहन्छौँ । नेकपा एमाले त्यस्तो शक्ति बन्न चाहन्छ ।’
