प्रधानमन्त्री हामीलाई हटाउने तयारीमा थिए : विष्णु पौडेल
नेकपा एमालेका उपाध्यक्ष एवं उपप्रधानमन्त्री तथा अर्थमन्त्री विष्णु पौडेलले प्रधानमन्त्री पुष्पकमल दाहाल प्रचण्डले आफूहरूलाई हटाउन लागेकाले सरकारबाट बाहिरिने निर्णय लिएको बताएका छन् । पार्टी सचिवालयको बैठकपछि उनले प्रधानमन्त्रीले आफूहरूलाई हटाउने वा विना विभागीय बनाउने तयारी गरेको प्रष्ट पारे ।
उनले भने, ‘पुस १० गते भएको सहमति अनुसार प्रधानमन्त्री राष्ट्रपतिमा अघि बढ्नुहोस् भन्ने हाम्रो चाहना थियो । घटनाक्रमहरू त्यसअनुसार अघि बढ्न सकेन । सहमति अनुसार अघि बढ्न नसक्ने प्रधानमन्त्रीले निरन्तर अभिव्यक्ति दिँदै आउनुभयो । राष्ट्रपतिमा सहमति बन्न नसकेपनि आफूहरू सरकारमा रहेर सहयोग गर्ने पक्षमा भएपनि प्रधानमन्त्रीले त्यो नचाहेको उनको भनाइ छ। प्रधानमन्त्री दाहालले नेकपा एमालेलाई सरकारबाट बाहिरिन दबाब दिएको बताए । एमाले सरकारबाट नबाहिरिए तत्काल मन्त्रीहरूलाई बर्खास्त गर्ने वा बिना विभागीय मन्त्री बनाउनेसम्मको चेतावनी दिएको आरोप लगाए ।
प्रधानमन्त्री दाहालले जेनेभा भ्रमणमा जान लाग्नुभएकी परराष्ट्रमन्त्री डा. विमला राई पौड्याललाई अन्तिम समयमा रोकेर प्रधानमन्त्रीले अपरिपक्वतादेखाएको र नेकपा एमालेमाथि प्रतिरोध साँधेको आरोप लगाए । अन्तिम समयमा राष्ट्रको प्रतिनिधित्व गर्नबाट रोक्नुले राष्ट्रको इज्जतमाथि नै प्रतिकुल असर परेको दाबी गरे ।
उनले भने, ‘ उहाँले एमाले सरकारबाट नहटे बिना विभागीय मन्त्रीको रूपमा राख्ने जस्ता अभिव्यक्ति दिनुभएपछि हामी सरकारमा बस्न सकेनौँ । त्यसैले सरकारबाट फिर्ता हुने निर्णय गरेका छौँ । राष्ट्रको इज्जतमाथि नै यसले प्रतिकुल असर पारेको छ ।’ उनले प्रधानमन्त्री दाहालले राष्ट्रपतिमा भएको सहमति कार्यान्वयन नगरेर देशमा राजनीतिक स्थिरता नचाहेको आरोप लगाए। यस्तै, राष्ट्रपतिको निर्वाचनमा एमालेको उम्मेदवार शानदार ढंगले विजयी हुने जिकिर गरे ।
