राष्ट्रपति चयन पूर्वसहमति अनुसार नै हुनुपर्छ : लेखराज भट्ट
नेकपा एमालेका सचिव लेखराज भट्टले सत्तारुढ गठबन्धनमा भएको सहमति अनुसार नै राष्ट्रपति चयन हुनुपर्ने बताएका छन् । प्रेस चौतारी कैलालीले आज बिहीबार अत्तरियामा गरेको पत्रकार सम्मेलनमा सचिव भट्टले सरकार गठनका बेला भएको सहमति अनुसार नै राष्ट्रपति चयन हुने बताएका हुन् ।
‘हिजोआज राष्ट्रपतिको निर्वाचनलाई लिएर गठबन्धन के हुन्छ भन्ने सबैको चासो छ । राष्ट्रपतिका लागि गठबन्धनमा जे सहमति भएको छ त्यहीअनुसार अघि बढ्छ,’ सचिव भट्टले भने, ‘पार्टीले सबैलाई मान्य हुनेगरी उपयुक्त उम्मेदवार उठाउँछ । गठबन्धन कायम रहन्छ ।’ राष्ट्रपति चुनावलाई लिएर गठबन्धन भत्किने सम्भावना नरहेको उनको भनाइ छ ।
