जनमत पार्टीमा प्रवेश गर्दै, लोसपा का नेता डा.शरद यादव
लोकतान्त्रिक समाजवादी पार्टी नेपाल (लोसपा)का युवा नेता डा.शरद यादव जनमत पार्टीमा प्रवेश गर्न लागेका छन् । उनी आइतबार जनमतको पार्टी कार्यालयमा हुने एक कार्यक्रमकाबीच पार्टी प्रवेश गर्न लागेका हुन् ।
लोसपा पार्टी अव्यवस्थित र असङ्गठित हुनुका साथै चलायमान समेत नभएकाले पार्टी छाड्न बाध्य भएको उनको भनाइ छ । मधेसका लागि केही गरौँ भनेर पार्टीमा लागेको भए पनि लोसपामा काम गर्ने कुनै योजना र तयारी नदेखिएको बताउँदै उनले नेताहरू सत्ता बार्गेनिङमा मात्रै रुमलिरहेको आरोप लगाए ।
‘लोसपा गठन भएको लामो समय भइसक्यो तर पार्टीमा कसैलाई जिम्मेवारी दिएको छैन’, उनले भने, ‘केन्द्रीय समितिदेखि लिएर अन्य सङ्गठनहरू पनि बन्न सकेको छैन, चार पाँच जना नेताहरू कार्यकारिणी समिति चलाई रहेका छन्, पाँच जना नेताले जे निर्णय गर्छन् त्यही सबैलाई मान्नुपर्ने बाध्यता सृजना भएको छ ।’ उनले लोसपामा यतिकै घाम तापेर बस्नुभन्दा त अरू ठाउँमा आफ्नो इनर्जी र क्षमता लगाए राम्रो हुने ठानेर जनमत रोजेको बताए ।
