वामदेव गौतम नेकपा एसमा जाने तयारी
नेकपा एकीकृत समाजवादी पार्टीले घनश्याम भुसाललाई महासचिव बनाउनेगरी छलफल अघि बढाएको छ । एमाले परित्याग गरेर स्वतन्त्र चुनाव लडेका भुसाल पुस २९ गते नेकपा एस प्रवेश गरेका थिए । नेकपा एसले उनलाई सचिवालय सदस्यमा मनोनीत गरिसकेको छ । भुसाललाई महासचिव बनाउनेगरी छलफल अघि बढेको नेकपा एसका एक पदाधिकारीले बताए ।
उनले भने उहाँले पार्टीमा प्रवेश गर्नुअघि नै महासचिवको प्रस्ताव राख्नुभएको थियो । त्यहीअनुसार छलफल अघि बढेको छ । आगामी केन्द्रीय कमिटीको बैठकले अनुमोदन गर्नसक्छ । घनश्यामलाई महासचिव बनाउनका लागि हालका महासचिव बेदुराम भुसालको व्यवस्थापन महत्वपूर्ण भएको ती नेताले बताए ।
उनले भने घनश्यामजीलाई महासचिव बनाउँदा बेदुरामजीको व्यवस्थापन गर्नुपर्ने हुन्छ । उहाँलाई कसरी व्यवस्थापन गर्ने भन्नेबारेमा अहिले छलफल भएपनि सहमतिमा पुग्न सकिएको छैन । पछिल्लो समसामयिक विषयमा छलफल गर्न माघ २१ र २२ गते नेकपा एसले केन्द्रीय समिति बैठक बोलाइएको उपमहासचिव गंगालाल तुलाधरले बताएका छन् । उनले एमालेका पूर्वउपाध्यक्ष तथा कम्युनिष्ट एकता अभियानका संयोजक वामदेव गौतम पनि पार्टीमा चाँडै भित्रिने दाबी गरे । नेता तुलाधरले भने, ‘उहाँ (वामदेव) हाम्रो पार्टीमा आउन सकारात्मक हुनुहुन्छ । अब केही दिनमा उहाँको प्रवेशबारे टुंगो लाग्छ ।
कम्युनिष्ट पार्टी निर्माणको विषयमा नेता गौतमले उठाएको एजेन्डाप्रति आफूहरू सकारात्मक रहेको उनको भनाइ छ ।घनश्यामलाई महासचिव बनाएपछि नेता गौतम र बेदुरामको व्यवस्थापनमा समस्या भएको एक नेताले बताए । उनले भने, ‘उहाँ (वामदेव) एमालेमै उपाध्यक्ष हुनुहुन्थ्यो त्यसैले यहाँ आउँदा वरिष्ठ उपाध्यक्ष दिने कि भन्नेबारेमा छलफल भइरहेको छ । तर, बेदुरामजीलाई पनि व्यवस्थापन गर्नुपर्ने हुन्छ । त्यसैले थप निर्णय केन्द्रीय कमिटीबाटै गराऔं भन्ने कुरा भइरहेको छ ।
मंगलबार नेकपा एसका अध्यक्ष माधव नेपालले पार्टी कार्यालय आलोकनगरमै बोलाएर नेता गौतमलाई पार्टीमा एकताबद्ध हुन आग्रह गरेका थिए । गौतमले छिट्टै यसबारे निर्णय गर्ने जवाफ दिएका छन् । सो अवसरमा दुवै पक्षबीच आफ्ना दस्तावेजहरू आदानप्रदान भएको थियो ।
