गगन थापालाई क-कसले दियो धोका, यस्तो छ नालिबेली

 

 

सोमबार रातिसम्म गगन थापाको ‘कोर टीम’ ले ३४ जना सांसद आफ्नो पक्षमा निकालेको थियो । जतिबेला गगनको टीमका सदस्य बालुवाटारबाट खटाइएका भनिएका सादा पोशाकका प्रहरीको परिचयपत्र थुतेर सामाजिक सञ्जालमा हाल्दैथिए, त्यति नै बेला गगन पक्षले आफ्नो मानेका दुईजना सांसद बालुवाटार छिर्दै थिए ।

सप्तरीका तेजुलाल चौधरी र रौतहटका देवप्रसाद तिमल्सिना पालैपालो बालुवाटारभित्रबाट प्रधानमन्त्री शेरबहादुर देउवादम्पतीलाई भेटेर बाहिरिँदा गगनको हिसाब बिग्रिसकेको थियो । तर, पनि बिहानसम्म गगन पक्ष कम्तीमा ३४ बढीमा ३७ सांसदको हिसाब लगाइरहेको थियो । महाधिवेशनको पक्षधरताका आधारमा शेखर गगन पक्षका २७ सांसद थिए । विश्वप्रकाश शर्मा, प्रदीप पौडेल, दीपक गिरी र रूपा विकको भोट थपिँदा ३१ पुगेको थियो ।

गगन पक्षले त्यसमा देउवा समूहका स्याङ्जाका राजु थापा, काठमाडौंका सन्तोष चालिसे, राजेन्द्र केसीलगायतको पनि मत थपिने अपेक्षा गरेको थियो । यतिसम्मकी विश्वप्रकाश शर्मासँग निकट भएका कारण सिन्धुलीका श्याम घिमिरेको मत पनि पाउने गगन पक्षको महात्वाकांक्षा थियो । तर, मतपरिणाम सार्वजनिक हुँदा गगन थापाले आफ्नै गुट र आफ्ना प्रस्तावक समर्थकसमेत थपिएपछिको ३१ मत पनि जोगाउन सकेनन् ।

गगन पुस्तान्तरणको एजेण्डा लिएर भुइँको समेत टिपेर चुनाव जित्न चाहन्थे, तर परिणाममा उनले पोल्टाको पनि गुमाए । देउवा समूहबाट क्रस भोट गराउन असफल भएका उनले आफ्नो समूहको क्रस भोट समेत रोक्न सकेनन् । सांसदहरूले मत हालेको फोटो खिच्न थालेपछि उनको पराजय निश्चित भइसकेको थियो ।

एक थान मन्त्रीको लागि यसपटक कांग्रेसका सांसदहरू जे पनि गर्न तयार छन् भन्ने यसले देखाएको छ । हुन पनि यसपटक रामचन्द्र पौडेल, शेखर कोइराला, शशांक कोइराला, प्रकाशमान सिंह, विमलेन्द्र निधी, पूर्णबहादुर खड्का तहका नेताहरू समेत एकबारको जुनीमा एक थान मन्त्री भने पनि नछाड्ने तहमा पुगिसकेका छन् । यस्तामा जुनियनर सांसदले गुट होइन मन्त्रीको आश्वासनलाई विश्वास गरे ।

गगनले २५ मत पाउँदा उनको पक्षमा सोमबार साँझसम्म प्रष्टरूपमा देखिएको ६ मत पनि देउवातिर गयो । गगनको कोर टीमले अपेक्षा गरेका अरु कम्तीमा ७ देखि १० मत आएनन् । केही सांसदले मतपत्रको फोटो खिच्न थालेपछि नै गगनले यसको संकेत दिइसकेका थिए । कतिपय शेखर-गगन पक्षकै सांसदले फोटो खिचेर आरजु देउवालाई ह्वाट्सएप गरेका थिए ।

गगनको कोर टीमको रातो घेरामा परेका ती सांसदले भने, ‘हुन त मलाई पनि उनीहरूले भोट नदिनेको सूचीमा राखेका छन् । तर मैले धर्म निभाएको छु । तर, रामचन्द्र, शशांकहरूप्रति गरिएको अमर्यादित टिप्पणी, प्रहरीमाथिको उच्छृंखल व्यवहार र घण्टी (रास्वपा) का कार्यकर्ताहरूबाट सांसदहरूलाई सार्वजनिकरूपमा दिइएको धम्कीपूर्ण फेसबुक मेसेज तथा स्टाटसहरूले पनि कतिपय सांसद इरिटेड भए ।’

गगनको पक्षमा आ-आफ्नो क्षेत्रका सांसदहरूलाई खबरदारी गरेर फेसबुक मेसेज तथा एसएमएस गर्नेक्रममा राष्ट्रिय स्वतन्त्र पार्टीका कार्यकर्ता प्रयोग भएको आरोपसमेत लगाइएको छ । विश्वप्रकाश र प्रदीप पौडेलको इन्ट्रीले कतिपय कांग्रेस सांसद भड्किएको दाबी पनि गरिएको छ ।

चुनाव हारेपछि त्यसका अनेक कारणहरूको विश्लेषण हुनु स्वाभाविक हो । तर, गगनको उदयमा कुण्ठा पाल्ने केही नेता शेखर गगन गुटमै छन् । उनीहरूले बाध्य भएर शेखरले समर्थन गरेपछि गगनको पक्ष लिएको देखाए पनि भित्र मतदानमा देउवालाई मत दिएर त्यसको प्रमाण बालुवाटार पुर्याएको आरोपसमेत छ ।

केही दिनमै गठबन्धनको सरकार बनेर त्यसमा पर्ने मन्त्रीहरूको अनुहारले पनि गगनको चुनावमा उनकै गुटका क-कसले धोका दिए भन्ने अनुमान लगाउन सकिने नेताहरू बताउँछन् । तर, गगनकै दौँतरी तथा उनीभन्दा सिनियर ५०/६० कटिसकेका ‘युवा नेता’ हरूले उनलाई मत नदिएको आशंका छ ।

गगननिकट एक केन्द्रीय सदस्य तथा सांसदले भने, ‘हारेपछि अरु धेरै टिप्पणी गर्नुको अर्थ छैन । प्रष्ट भन्दा शेखर कोइराला र धनराज गुरुङ पक्षले भोट दिएन ।शेखरले छाड्ने हो भने उपसभापतिको हैसियतले म उठ्नुपर्छ भनेर धनराजले आफुनो रुप देखाइसकेको थियो । उनीहरुसहित चन्द्र भण्डारी समेत एक थान मन्त्रीमा लोभिएपछि यो परिणाम स्वभाविक थियो ।