कांग्रेसको सरकार बने मुख्यमन्त्री म हुन्छु : इन्द्र बानियाँ
नेपाली कांग्रेसका नवनिर्वाचित प्रदेशसभा सदस्य इन्द्रबहादुर बानियाँले वागमती प्रदेशमा नेपाली कांग्रेसको सरकार बनेको अवस्थामा आफू मुख्यमन्त्री हुने दाबी गरेका छन् ।
मुख्य निर्वाचन अधिकृतको कार्यालय हेटौँडाले आज गरेको प्रमाणपत्र वितरण कार्यक्रमपछि पत्रकारहरुलाई प्रतिक्रिया दिँदै बानियाँले आफू यसअघि पनि कांग्रेस बागमती प्रदेश संसदीय दलको नेता भएको कारण यो पटक पनि मुख्यमन्त्रीको स्वभाविक दाबेदार भएको बताए ।
उनले भने ‘मुख्यमन्त्रीको प्रबल संभावना या दाबेदार जे भनेपनि म हो जस्तो लाग्छ अहिलेसम्म, प्रत्यक्षमा पनि बढि आएको र समानुपातीकमा पनि वागमतीमा हाम्रो बढी सिट आउने देखिएको छ, त्यसकार यो बागमती प्रदेश कांग्रेसको भागमा पर्छ र कांग्रेसकोमा पर्दाखेरी संसदीय दलको नेता म भएभने मै मुख्यमन्त्री हुन्छु जस्तो लाग्छ मलाई, त्यो त अरु बिकल्प छैन ।’ संघियता भनेको प्रदेशलाई बुझिने बताउँदै अब संघियता कार्यन्वयनको लागि गठवन्धन भएको बानियाँको दाबी छ । देशको पाँचवटा प्रदेशमा बहुमत देखिएको भन्दै उनले केन्द्र र प्रदेशमा गठवन्धनको सरकार निर्माण हुने बताए ।
