चुनाव हारेका देउवाका मन्त्रीहरु अझै सिंहदरवारतिर घाम ताप्दै
सरकारमा रहेका ६ मन्त्री प्रतिनिधिसभामा पराजित भएका छन् तर राजीनामा दिएका छैनन् । आफ्नै निर्वाचन क्षेत्रमा अस्वीकृत भएपछि राजीनामा दिनु सामान्य कुरा भए पनि मन्त्रीहरु सिंहदरवार फर्किएर गडबडीमा ब्यस्त बनेका हुन ।
गृहमन्त्री बालकृष्ण खाँण, ऊर्जा जलस्रोत तथा सिँचाइमन्त्री पम्फा भुसाल, पर्यटनमन्त्री जीवनराम श्रेष्ठ, खानेपानीमन्त्री उमाकान्त चौधरी, खेलकुदमन्त्री महेश्वरजंग गहतराज र मन्त्रिपरिषद् कार्यालयका राज्यमन्त्री उमेश श्रेष्ठ यो निर्वाचनमा पराजित भए पनि मन्त्रालय फर्किएर गडबडीमा रमाउन थाल्नुभएको हो
गृहमन्त्री खाँण प्रधानमन्त्रीपछि दोस्रो वरीयतामा कायमै छन्, अरू मन्त्री पनि उहाँभन्दा फरक देखिएनन । खाँण रूपन्देही–३ बाट राप्रपाका दीपक बोहरासँग पराजित हुनभएको हो । शनिबार सम्पन्न मतगणनामा बोहराले ३६ हजार ७ सय १७ मत ल्याउँदा कांग्रेस उम्मेदवार खाँणले ३४ हजार ३६ मत मात्रै पाउनु भयो । यद्यपि श्रीमती मञ्जु खाँण कांग्रेसको समानुपातिक सूचीमा खसआर्यतर्फ छैटौं नम्बरमा हुनुहुन्छ । उहाँ सांसद बन्ने पक्कापक्की छ ।
खानेपानी तथा सरसफाइमन्त्री उमाकान्त चौधरी पनि बारा–१ बाट पराजित हुनुभएको छ । उहाँ एमालेका अच्युतप्रसाद मैनालीसँग ९ हजार १ सय ३९ मतान्तरले पराजित हुनुभएको हो । मैनालीले ३९ हजार १ सय ९५ मत ल्याउँदा चौधरीले ३० हजार ५६ मत पाउनु भएको छ । उहाँ कांग्रेस नेता कृष्णप्रसाद सिटौलाको कोटाबाट मन्त्री बन्नुभएको थियो । सिटौला पनि झापा–३ मा राप्रपाका राजेन्द्र लिङ्देनसँग पराजित हुनुभएको छ ।
ऊर्जा जलस्रोत तथा सिँचाइमन्त्री भुसाल ललितपुर–३ मा तेस्रो हुनुभयो, त्यो पनि फराकिलो अन्तरले । स्वतन्त्र पार्टीकी तोसिमा कार्कीले ३१ हजार १ सय ३६ मत ल्याउँदा एमालेका अमृत खड्काले १२ हजार ९ सय ६३ र माओवादीकी भुसालले ८ हजार ७ सय ६९ मत पाउनु भएको थियो ।
माओवादी प्रतिनिधित्व गर्ने युवा तथा खेलकुदमन्त्री गहतराज बाँके–१ मा एमाले उम्मेदवार सूर्यप्रसाद ढकालसँग पराजित हुनुभयो । २०७४ मा वाम गठबन्धनको साझा उम्मेदवार बनेर जितेका उहाँले यसपालि १९ हजार ६ सय ३२ मत पाउनु भयो, एमालेका ढकाल भने २५ हजार २६ मत ल्याएर विजयी हुनुभयो ।
माओवादीबाट मन्त्री बनेका भुसाल र गहतराजले नैतिकताका आधारमा राजीनामा दिन पनि पार्टीको निर्देशन पर्खेर बसेको भन्दै दुनियाँ हसाउनु भएको छ ।
काठमाडौं–८ बाट उम्मेदवार बनेका संस्कृति, पर्यटन तथा नागरिक उड्डयनमन्त्री श्रेष्ठ पनि तेस्रो हुनुभयो । राष्ट्रिय स्वतन्त्र पार्टीका विराजभक्त श्रेष्ठले १० हजार १ सय ५ मत ल्याएर जित्दा हाम्रो नेपाली पार्टीका सुमन सायमी ५ हजार ८ सय ८९ मत ल्याएर दोस्रो हुनुभयोए । एकीकृत समाजवादीका उम्मेदवार श्रेष्ठले भने ४ हजार ८ सय ७७ मत पाउनु भयो । तर मन्त्रालयमा बसेर निर्धक्क बदमासी गरिरहनु भएको छ ।
प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठ चितवन–२ मा राष्ट्रिय स्वतन्त्र पार्टीका सभापति रवि लामिछानेसँग असाधारण अन्तरले पराजित हुनुभएको छ । लामिछानेले ४९ हजार २ सय ६४ मत ल्याउँदा श्रेष्ठले १४ हजार ९ सय ८३ मत ल्याउनु भएको छ ।
हरुवा मन्त्रीहरु मन्त्रालय आएर कमाउ धन्दातिर लागेपछि सचिव र सहसचिवहरुको भागाभाग चलेको छ । उनीहरु मन्त्री आएको थाह पाउन साथ मन्त्रालय छाडेर हिडने अवस्था आएको ती मन्त्रालयका कर्मचारीले बताएका छन ।
