देशभर मतगणना जारी : कुन क्षेत्रमा कसको अग्रता ? (सूचीसहित)
आइतबार भएको प्रतिनिधि सभाको निर्वाचनको मतगणना जारी छ। प्रतिनिधि सभातर्फ सोमबार ३ बजेसम्ममा नेकपा एमाले अगाडि देखिएको छ । एमालेले हालसम्म झापा २, धनुषा ३, ललितपुर १, ललितपुर २, ललितपुर ३, काठमाडौं ३, काठमाडौं ९, बाँके ३, दाङ ३, बारा १, दैलेख १ र चितवन २ गरी १२ स्थानमा अग्रता लिएको छ ।
नेपाली कांग्रेसले भक्तपुर २, काठमाडौं १, काठमाडौं ४, चितवन १, मकवानपुर १, काठमाडौं १० र सुर्खेत २ गरेर सात स्थानमा अगाडि छ । कांग्रेसले मुस्ताङबाट जितको पहिलो खाता खोलिसकेको छ । कांग्रेस उम्मेदवार योगेश गौचनले निकटतम प्रतिस्पर्धी नेकपा एमालेका निवर्तमान सांसद प्रेम तुलाचन हराएर कांग्रेसबाट जितको खाता खोले ।
यस्तै, रवि लामिछाने नेतृत्वको राष्ट्रिय स्वतन्त्र पार्टी पनि यही निर्वाचनबाट उदय हुने देखिएको छ । हालसम्म झापा ४, काठमाडौं ६, काठमाडौं ७, काठमाडौं ८ र कास्की २ गरेर पाँच स्थानमा अग्रता लिएको छ।
माओवादी केन्द्र सर्लाही ३, नेकपा एस धादिङ जनमत पार्टी सप्तरी १ र सप्तरी २, राप्रपाले भक्तपुर १ र झापा ३, नागरिक उन्मुक्तिले कैलाली १, लोसपाले रुपन्देही ४ मा अग्रता लिएको छ । हालै मात्रै दर्ता गरेर चुनावमा होमिएको लामिछाने नेतृत्वको स्वतन्त्र पार्टीले ५ केन्द्रमा अग्रता कायमै राख्दा माओवादी र नेकपा एस कमजोर देखिएको छ।
