काठमाडौं क्षेत्र नम्बर ५ एमालेले जित्ने गुप्तचर विभागको रिपोर्ट
नेपालको सरकारी गुप्तचर निकायको रुपमा रहेको राष्ट्रिय अनुसन्धान विभागले काठमाडौं क्षेत्र नम्बर ५ मा नेकपा एमालेका वरिष्ठ उपाध्यक्ष ईश्वर पोखरेलले चुनाव जित्ने गोप्य रिपोर्ट सार्वजनिक गरेको छ । राष्ट्रिय अनुसन्धान विभागले गोप्य रुपमा गरेको अनुसन्धानका क्रममा काठमाडौं क्षेत्र नम्बर ५ मा एमालेका वरिष्ठ उपाध्यक्ष ईश्वर पोखरेलले चुनाव जित्ने देखिएको गुप्तचर विभागले प्रक्षेपण गरेको छ ।
चुनावी नतिजामा पोखरेलले चुनाव जित्ने र काँग्रेसका प्रदीप पौडेल दोस्रो हुने विभागको रिपोर्टमा उल्लेख छ । मतदातामा देखिएको प्रभाव र चुनावी वातावरण पोखरेलको पक्षमा रहेको राष्ट्रिय अनुसन्धान विभागले जनाएको छ ।
काठमाडौं क्षेत्र नम्बर ५ मा काठमाडौं महानगरपालिकाका चार वटा तथा टोखा नगरपालिका र बुढानिलकण्ठ नगरपालिकाका ११ वटा वडा गरी जम्मा १५ वटा वडा छन् । गत स्थानीय निर्वाचनमा नेकपा एमाले एक्लैले ११ वटा वडामा अध्यक्ष जितेको छ भने अन्य वडामा अध्यक्ष बाहेक सदस्यहरु जितेको छ । स्थानीय तहको चुनावलाई आधार मान्ने हो भने पनि काठमाडौं क्षेत्र नम्बर ५ मा एमाले निकै बलियो छ ।
यसो त एमालेका पोखरेल यो क्षेत्रका बासिन्दा र लामो समयदेखि यस क्षेत्रमा भिजेका नेता हुन् । पोखरेलले यस क्षेत्रको विकासको नेतृत्व लिँदै राष्ट्रिय राजनीतिमा पनि महत्वपूर्ण भूमिका खेल्दै आएका छन् । अघिल्लो निर्वाचनमा काँग्रेसका उम्मेदवार डा. रामशरण महत उम्मेदवार बनेका थिए । तर, उनी यसपालि पोखरेलसँग लड्न चाहेनन् । बरु, समानुपातिकमा सुरक्षित रहन चाहे ।
तनहुँमा टिकट नपाएपछि काँग्रेसले प्रदीप पौडेललाई तनहुँबाट ल्याएर उम्मेदवार बनाएको छ । तनहुँमा यस अघि माओवादीकी सामान्य नेतु आशा कोइरालासँग हारेका प्रदीप पौडेललाई काठमाडौं क्षेत्र नम्बर ५ को भूगोल नितान्त नयाँ हो । यसैगरी, काँग्रेसभित्रको आन्तरिक लडाईंले पनि उनलाई निकै अप्ठेरो छ । काँग्रेस भित्रको लडाईंले गर्दा उनले तनहुँकै युवाहरु र नेविसंघका कार्यकर्तामात्रै लिएर घरदैलो गर्न बाध्य भएका छन् । यसो त काठमाडौं क्षेत्र नम्बर ५ मा स्वतन्त्रबाट दुई दर्जन उम्मेदवार बनेका छन् । तर, ७१ हजार मतमध्ये उनीहरुले एक हजार मत पनि नकटाउने प्रपेक्षण गरिएको छ ।
