गिरिजाप्रसाद कोइराला हाम्रा अभिभावक थिए : प्रचण्ड
नेकपा माओवादी केन्द्रका अध्यक्ष पुष्पकमल दाहाल (प्रचण्ड) ले शान्ति प्रक्रियाका दुई हस्ताक्षरकर्तामध्ये एक गिरिजाप्रसाद कोइराला नभएको अवस्थामा कांग्रेसजनले प्रचण्डको महत्व बुझ्नुपर्ने बताएका छन् । गठबन्धनका उम्मेदवारहरूको उपस्थितिमा गोरखा-काठमाडौं सम्पर्क समितिले आयोजना गरेको कार्यक्रममा अध्यक्ष प्रचण्डले आफूले गिरिजाप्रसादलाई राष्ट्रिय अभिभावकका रूपमा सम्मान गरेको विषयलाई सबैले बुझ्नुपर्ने बताए ।
कांग्रेस कार्यकर्ताप्रति संकेत गर्दै उनले भने, ‘यहाँ तपाईँहरूले बुझ्नुपर्ने हुन्छ मैले र गिरिजाबाबुले शान्ति प्रक्रियालाई सम्झौतामार्फत स्थापित गर्यौँ । गिरिजाबाबुलाई मैले राष्ट्रिय अभिभावकको सम्मान दिएँ । शान्ति सम्झौतामा हस्ताक्षर गर्ने एउटा पक्ष प्रचण्डलाई उहाँ मृत्यु शय्यामा पुगेका बेला तपाईँ हुनुहुन्छ म ढुक्क छु भन्ने ठाउँमा पुर्याएको कुरालाई गिरिजाबाबुको गल्ती कमजोरी भन्न सक्नुहुन्छ ? प्रचण्डको गल्ती कमजोरी भन्न सक्नुहुन्छ ? सबै सचेत साथीहरूले विशेषरूपमा विचार गर्नुस् ।
गोरखा २ बाट उम्मेदवार बनेका प्रचण्डले कांग्रेस कार्यकर्तालाई विगतका तीतामीठा बिर्सेर ऐतिहासिक भूमिका खेल्न आग्रह गरे । उनले माओवादी जनयुद्धका क्रममा पीडा भोगेका गोरखाका कांग्रेस कार्यकर्ता र तीनका परिवारलाई भेटेर मल्हमपट्टी लगाउन आफू तयार रहेको समेत बताए ।
