देशको ढुकुटीमा यो सरकारले लुटपाट मच्चायो : केपी ओली
नेकपा एमालेका अध्यक्ष केपी शर्मा ओलीले गठबन्धन सरकार नालायक, भ्रष्ट, खन्चुवा र लुटेरा भएको बताउनु भएको छ । झापामा आज आयोजित मतदातासँगको भेटमा अध्यक्ष ओलीले गठबन्धन सरकारले देशको ढुकुकी लुटेको तथ्य राख्नुभएको हो ।
अहिलेको सरकारदेखि विश्व नै लज्जित भएको भन्दै उहाँले गठबन्धनलाई कुनै लाज नभएको बताउनु भएको छ । उहाँले भन्नुभयो, ‘संसद्ले नभएर सेटिङमा बनेको सरकार, असंवैधानिक सरकार, परमादेशबाट बनेको नालायक, भ्रष्ट, खन्चुवा, लुटेरा सरकार बनेको छ । केही व्यक्ति बोलाएर अर्थमन्त्रीले करका दर हेरफेर गर्छ । देशको ढुकुटीमा योभन्दा ठुलो लुट अरू के हुन्छ ? यो सरकार देखेर विश्व लज्जित छ, तर गठबन्धनलाई कुनै लाज छैन ।’
उहाँले आफू नेतृत्वको एमाले सरकारले धेरै विकासका काम गरेको फेहरिस्त पनि सुनाउनु भयो । आफू नेतृत्वको सरकारले गरेका ठुला विकासका काम देखेर एमालेको सरकार ढालेको पनि उहाँले बताउनु भयो ।
उहाँले भन्नुभयो, ‘हामीले धेरै काम गर्यौं । पाइपलाइनबाट पेट्रोल ल्यायौँ । अब भारतले नाका बन्द गरेपनि पेट्रोल आउँछ । हामीले तीन वर्षमा मेलम्चीको पानी काठमाडौं ल्यायौँ । तेस्रो अरुण जलविद्युतको सुरुवात गर्यौं । तामाकोसीबाट विद्युत उत्पादन गरेर लोडसेडिङको अन्त्य गर्यौं । मैले विकास गर्न थालेपछि मेरो नेतृत्वको सरकार ढाल्यो ।’
