फेरी एमाले देशको नेतृत्वमा आउँछ : वरिष्ठ उपाध्यक्ष पोखरेल
नेकपा एमालेका वरिष्ठ उपाध्यक्ष ईश्वर पोखरेलले मंसिर ४ को निर्वाचनपछि देशको नेतृत्व फेरी पनि एमालेले गर्ने दाबी गरेका छन् । प्रतिनिधिसभाका लागि काठमाडौं क्षेत्र नम्बर-५ बाट उम्मेदवारसमेत रहेका पोखरेलले सोमबार बिहान टोखा नगरपालिका- ६ मा आयोजित कार्यक्रममा देशको नेतृत्व गर्न सक्ने पार्टी एमाले मात्रै भएको बताएका हुन् ।
गत स्थानीय तहको निर्वाचनमा एमालेलाई टर्च बालेर खोज्नुपर्ने बनाउने भन्दै भाषण गर्नेहरुका अगाडि जनताले एमालेलाई सर्वाधिक मत दिएर विजयी गराएपछि अहिले विदेशीहरुसँग मिलेर एमालेलाई सरकारमा आउन नदिन अनेक प्रपञ्च रचिरहेको बताए ।
देश विकास गर्न सक्ने पार्टी एमालेमात्रै हो भन्ने जनताले थाहा पाइसकेको भन्दै केही उपाय नलागेपछि विरोधीहरु जनतामा एमालेकाविरुद्वमा भ्रम छर्न लागिपरेका पोखरेलले जिकिर गरे । उनले सत्ता गठबन्धनको आलोचना गर्दै भद्दा र स्वार्थहरूको गठबन्धनले देश विकासको अभियानलाई सञ्चालन गर्न नसक्ने बताए ।
