जसपाका मन्त्री बर्खास्त गर्ने तयारीमा प्रधानमन्त्री देउवा
प्रधानमन्त्री शेरबहादुर देउवाले जनता समाजवादी पार्टीका चार मन्त्रीले आजै राजीनामा नदिए बर्खास्त गर्ने भएका छन् । गठबन्धनका शीर्ष नेताहरुसँगको परामर्शपछि जसपाका मन्त्रीहरुसँग राजीनामा मागिएको हो । जसपाका एक मन्त्रीले राजीनामा नदिए बर्खास्त हुने नरम भाषा प्रयोग गरिएको बताए । जसपाबाट राजेन्द्र श्रेष्ठ, इस्तियाक राई, प्रदीप यादव र मृगेन्द्रसिंह यादव मन्त्री छन् ।
जसपालाई सत्ता गठबन्धन छाडेर एमालेसँग चुनावी तालमेल गरेपछि सरकारबाट मन्त्री हटाउन दबाब छ । तर, जसपाका सहअध्यक्ष एवं मन्त्री श्रेष्ठले भने आफूहरु सत्ता गठबन्धनमै रहेको र एमालेसँग आंशिक ठाउँमा चुनावी तालमेलमात्र भएको बताए । श्रेष्ठले आफूहरु पाँच दलीय गठबन्धनको साझा न्यूनतम कार्यक्रममार्फत सरकारमा गएको र त्यसमा प्रतिबद्ध रहेकाले सरकारबाट हट्ने कुरा नहुने बताए । उनले प्रधानमन्त्रीले बर्खास्त गरे अलग कुरा हुने भन्दै आफूहरु एजेण्डाका आधारमा पाँच दलमै रहेको दाबी गरे ।
