सत्ता गठबन्धनमा खटपट, माधव नेपाल आउट हुने संकेत
सत्ता गठबन्धनमा खटपट भएको छ । नेकपा माओवादी केन्द्र र नेकपा एकीकृत समाजवादी पार्टीले आफूले जितेको प्रतिनिधि र प्रदेशसभाको सिट कुनै हालतमा नछाड्ने अडान लिएपछि गठबन्धनमा विवाद आएको छ ।
उनीहरूले गठबन्धनबीच सिट बाँडफाँडका लागि सम्बन्धित दलले जितेका स्थानमा तीनै दलको भागमा पर्नुपर्ने अडान राख्दै आएका छन् । तर नेपाली काँग्रेसले भने स्थानीय निकायको मत परिणामलाई आधार मान्नुपर्नेमा जोड दिएको छ ।
जसअनुसार माओवादी, एस र जसपाले २०७४ मा जितेको सिटमा कमजोर अवस्था भए छाड्नुपर्ने शर्त छन् । तर, प्रचण्ड, माधव नेपाल र उपेन्द्र यादव तीनैजना यसमा असहमत छन् । माओवादीले २०७४ मा जितेको ३६ सिटमा नछाड्ने अडान लिइरहेको छ । प्रचण्ड त्यसमा टसमस नहुने भएका छन् ।
जसपाले २०७४ मा जितेर बहालवाला सांसद रहेका ९ जनाको चुनावी क्षेत्र नछाड्ने अडान लिएको छ । उपेन्द्र यादवले थप १० क्षेत्र समेत मागेको बुझिएको छ । बाबुराम भट्टराई र महिन्द्र राय यादवले पनि आआफ्नो क्षेत्रमा गठबन्धनबाट साझा उम्मेदवार बन्न प्रचण्डसँग कुरा मिलाइसकेका छन् ।
बाबुरामले छोरी मानुषीका लागि काठमाडौंको कुनै एक क्षेत्र सुनिश्चित गर्न खोजेका छन् । त्यस्तै, जनमोर्चा नेपालले प्यूठान नछाड्ने भएको छ । उक्त क्षेत्रमा बामदेवको दाबी भएपनि जनमोर्चा टसमस भएको छैन ।
कांग्रेसले आफूहरुबाट बहालवाला सांसद रहेको क्षेत्र पनि दाबी गरेको भन्दै प्रचण्ड, माधव नेपाल र उपेन्द्र यादव असन्तुष्ट भएका छन् । उनीहरुले कुनै हालतमा पछि नहट्ने गरी अडान लिएका छन् ।
