रवीन्द्र मिश्रपनि केपी ओलीको शरणमा
पछिल्लो समय राजसंस्थाको पक्षमा खुलेर नयाँ राजनीतिक तरंग सिर्जना गरिरहेका विवेकशील साझाका पूर्वअध्यक्ष रवीन्द्र मिश्र आइतबार साँझ एमाले अध्यक्ष केपी शर्मा ओलीको निवासमा देखापरे । ओलीको बहुचर्चित बालकोट निवासमा मिश्रको यो पहिलो पाइला टेकाइ थियो भने ओलीसँग पहिलो वान टु वान भेट पनि ।
बेलुका ७ बजे निवासमा आइपुगेका मिश्रसँग ओली करिब अढाई घन्टा गफिए । उक्त गफगाफको मुख्य विषय राजनीतिक नै थियो । यद्यपि, ‘राष्ट्रवादी’ छविका दुई नेताहरुबीच राष्ट्रियतासँग सम्बन्धित मुद्दाहरुमा पनि विमर्श हुने नै भयो । ओलीले आफ्नो सरकारका पालामा चुच्चे नक्शासहित छपाएका सिक्काहरु अर्को सरकारले सार्वजनिक गर्न रोकेको दावी गरेका थिए । उनले केही उपहारका रुपमा आफूलाई केही सिक्काहरु दिएको मिश्रले फेसबुकबाटै सार्वजनिक गरिसकेका छन् ।
राजनीतिक विषयको कुराकानी चाहिँ आगामी निर्वाचनमाथि नै केन्द्रित थियो । स्रोतका अनुसार मिश्रले आगामी निर्वाचनमा एमाले र विवेकशीलबीच तालमेलको अनौपचारिक प्रस्ताव राखेका थिए । त्यसमा ओली सकारात्मक सुनिए । गठबन्धनका कारण देशको दलीय प्रणालीमै आघात परिरहेको भन्दै ओलीले आगामी चुनावमा आफ्नो पार्टी स्थानीयस्तरमा तालमेलका लागि खुला रहेको संकेत गरे ।
