पल शाहको मुध्दा टुङ्ग्याउने आज पालो
गायिका समीक्षा अधिकारीलाई उमेर नपुग्दै बलात्कार गरेको अभियोगअन्तर्गत पुर्पक्षको निम्ति दमौली जेल पुर्याइएका अभिनेता पल शाहको मुद्दाको आज पेशी चढेको छ । तनहुँ र पूर्वी नवलपरासी जिल्ला अदालतमा दायर भएका दुई छुट्टाछुट्टै मुद्दामध्ये कावासोतीमा मुद्दाको पेशी आज चढ्न लागेको हो । उमेशप्रसाद लुइँटेल त्यहाँ न्यायाधीश हुनुहुन्छ भने भर्खरै न्याय परिषदबाट नयाँ पोष्टिङ भएपछि पूर्वी नवलपरासी गएका आचार्य श्रीमानले पनि हिजो उक्त मुद्दाबारे जिज्ञासा राख्नुभएको स्रोतको दाबी छ । तर आजको पेशी शाहका वकिलहरुले हटाउन सक्ने सम्भावना पनि उत्तिकै छ । ‘न्यायाधीश भर्खर आउनुभएको छ,सम्भवतः अर्को पेशीमा यो मुद्दाको टुंगो लाग्न सक्छ,’ स्रोतले भन्यो ।
हालसम्मको बयान र साक्षी बुझ्ने क्रममा शाहले बलात्कार गरेको प्रमाणको रुपमा समीक्षाले प्रारम्भमा लगाएको आरोपबाहेक अरु केही नभएको अदालत स्रोतले बताएको छ । समीक्षा र उनका अभिभावकले समेत पछिल्लो बकपत्रमा ‘बलात्कार भएको होइन’ भनेपछि घटनाक्रमले नयाँ मोड लिएको हो । स्रोत भन्छ, ‘प्रमाणको रुपमा केही छैन । अर्कोतर्फ न्यायपरिषद्ले भटाभट कारवाही गरेकाले न्यायाधीशहरु मुद्दा छिनोफानो गर्न हिच्किचाएका मात्रै हुन् । प्रायः चर्चामा आएका मुद्दामा परिषद्को पछिल्लो कारवाहीले असर पारेको छ ।’
उक्त मुद्दालाई नजिकबाट अध्ययन गर्दै आएको सरकारी वकिल कार्यालयका वकिलहरु पनि सबै काम सहमतिमा भएको तर केही वर्षपछि आरोप लगाइएको भन्न थालेका छन् । जिल्ला अदालतमा रहेका दुई जना न्यायाधीशमध्ये पुराना उमेश लुईंटेल हुनुहुन्छ भने नयाँ न्यायाधीश आचार्य खुल्लाबाट नियुक्त भएपछि हालैमात्र त्यहाँ पुग्नुभएको हो ।
वकिलहरुले भनेका छन्,‘प्रमाण केही नभएकाले श्रीमानहरुले आँट गर्ने हो भने मुद्दाको छिनोफानो हुन धेरै समय लाग्दैन । बलात्कारको आरोप लगाएकी समीक्षाले पनि शाहलाई थुनाएर केही नआउने महसुस गरेकी छन् । बकपत्रकै क्रममा उनले त्यस्तो संकेत गरेकी हुन् ।’
अदालतमा बकपत्र गर्ने बेलामा अधिकारीका बाबुआमा चप्पल लगाएर पुगेका थिए । देख्दै विपन्न परिवारका उनीहरुले आफूहरुलाई केही थाहा नभएकाले त्यतिबेला कुरै नबुझी कागज गरेको बताएका छन् । ‘को को आए, लौ यसमा ल्याप्चे लगाइदेउ भने । हामीले लगाइदिएका मात्रै हौं । त्यसरी कागजमा ल्याप्चे लगाउन भन्दै घरमा आएकाहरु अहिले सबै तितरबितर भएका छन्,’ अधिकारीका बाबुुआमाको भनाइ उद्धृत गर्दै स्रोतले भन्यो ।
यता,अनुहार र स्वर दुबै राम्रो भएकी ती गायिकाको पनि बजार सुकेको छ । अघिल्लो वर्षसम्म गीत र म्युजिक भिडियोमा महिनाको लाखौं कमाउँदै आएकी उनको हातमा सुको पर्न छाडेको छ । ‘अरुले उचाले,छोरीको बदनाम गराइदिए । छोरीको भविश्य बिग्रियो । मुद्दा लगाएपछि ती सबै लाखापाखा लागे । हाम्रो बर्बाद भयो, हुँदै नभएको कुरोलाई उछालेर अरुले स्वार्थको काम गरे,’ बकपत्र गर्न अदालत पुगेका बेला समीक्षाका पिताले वकिलहरुसँग यस्तो बताएका छन् । जनआस्थाबाट
