नारायणकाजीलाई तर्साउन बाबुरामसँग सम्झौता
माओवादी अध्यक्ष प्रचण्ड माधवकुमार नेपालसहित सबै आकार-प्रकारका माओवादीहरूलाई एकतावद्ध तुल्याएर तेस्रो शक्तिको निर्माणमा जुट्नुभएको छ । मुलुकमा दुईदलीय अभ्यास हुन सक्ने सङ्केत देखिएपछि प्रचण्ड तेस्रो शक्ति निर्माण गरेर आफ्नो भूमिका जीवित राख्ने प्रयासमा जुट्नुभएको छ ।
बाबुराम भट्टराई, उपेन्द्र यादव, वामदेव गौतम, मोहन वैद्य, धर्मेन्द्र बास्तोला र नेत्रविक्रम चन्द ‘विप्लव’ समेतलाई समेटेर ‘समाजवादी केन्द्र’ नामक पार्टी गठन गर्ने योजनामा प्रचण्ड हुनुहुन्छ । विप्लव तत्काल समेटिने स्थितिमा नरहे पनि सम्भव भएसम्मका समूहलाई मिलाएर ‘समाजवादी केन्द्र’ निर्माण गरिने र, समाजवाद स्थापनाको मार्ग सुदृढ तुल्याउने बताइएको छ ।
यस क्रममा बाबुराम भट्टराईलाई प्रचण्डले आफ्नै पार्टीको चुनाव चिन्ह लिएर चुनाव लड्न सहमत गराउनुभएको छ । आगामी संसदीय निर्वाचनपछि संसद्मा छिर्ने बाटो फेला नपारेर छट्पटिएका बाबुराम प्रचण्डसँग सहमति बनेपछि ढुक्क भएको बताइन्छ । बाबुरामलाई गोर्खा क्षेत्र नं. २ बाट नै उम्मेदवार बनाइने बुझिएको छ । गत संसदीय निर्वाचनमा उक्त क्षेत्रमा माओवादीका तर्फबाट वरिष्ठ उपाध्यक्ष नारायणकाजी श्रेष्ठ उम्मेदवार बन्नुभएको थियो । यसपटक उक्त निर्वाचन क्षेत्रमा माओवादीले आफ्नो चिन्ह दिएर बाबुरामलाई उम्मेदवार बनाएमा नारायणकाजी श्रेष्ठको चुनावक्षेत्र कहाँ होला भन्ने प्रश्न उठेको छ ।
स्मरणीय छ, प्रतिनिधिसभामा श्रेष्ठ विजयी भएर आएमा उहाँबाट संसदीय दलको नेता पदमा दाबी रहने प्रचण्डको बुझाइ छ । त्यसैले श्रेष्ठलाई कुनै सूरक्षित निर्वाचन क्षेत्रबाट उम्मेदवार बनाउन प्रचण्ड चाहनुहुन्न । उहाँलाई पहिले मकवानपुरबाट उम्मेदवार बनाइएको थियो भने गत संसदीय निर्वाचनमा गोर्खा-२ बाट उम्मेदवार बनाएर पराजित गराइएको थियो । काङ्ग्रेससँग गठबन्धन भएर चुनावमा जाँदा उक्त निर्वाचन क्षेत्रबाट आगामी निर्वाचनमा नारायणकाजी श्रेष्ठको विजय हुने निश्चित मानिन्छ । त्यसैले श्रेष्ठलाई प्रतिनिधिसभामा प्रवेश हुनबाट रोक्नकै लागि प्रचण्डले बाबुरामलाई अगाडि सारेको ठानिएको छ ।
श्रेष्ठ राष्ट्रियसभाको सदस्य पद त्यागेर प्रतिनिधिसभाको निर्वाचनमा उम्मेदवार दिने तयारीमा रहेको बेला उहाँसँग सामान्य परामर्श नै नगरी प्रचण्डले बाबुरामसँग समझदारी बनाउनुभएको बताइएको छ । समाजवादी केन्द्र बनाउने र आफैं पुनः शक्तिशाली बन्ने योजनामा प्रचण्ड सफल/असफल जे भए पनि वरिष्ठ उपाध्यक्ष नारायणकाजीलाई पन्छाउन भने उहाँ सफल हुने सम्भावना छ । तर कदाचित गोर्खा परित्याग गर्नुपरेछ भने पनि कुनै सूरक्षित निर्वाचन क्षत्रमा श्रेष्ठलाई उम्मेदवार बनाउन प्रचण्ड बाध्य हुनुपर्ने स्थिति छ । गोर्खा बाबुरामलाई दिएमा ललितपुरको ३ नम्बर निर्वाचन क्षेत्रबाट श्रेष्ठलाई उम्मेदवार बनाउनुपर्ने माओवादी सम्वद्ध सूत्रले जनाएको छ । त्यस्तो स्थितिमा पम्फा भुसाललाई समानुपातिकमा पठाएर श्रेष्ठलाई उक्त क्षेत्रको उम्मेदवार बनाइन सक्ने सम्भावना रहने छ ।
