मन्त्री यादवद्धारा बुडर–बङ्क–नायल सडकको वातावरणीय प्रभाव मुल्याङकन प्रतिवेदन स्वीकृत
वन तथा वातावरणमन्त्री प्रदीप यादवले सुदूरपश्चिम प्रदेश स्थित डोटीको बुडर तथा कञ्चनपुर जिल्लाको बङ्क–नायल सडकको वातावरणीय प्रभाव मुल्याङ्कन प्रतिवेदन स्वीकृत गर्नु भएको छ । करिब १२.५ किमी लम्बाई रहेको उक्त सडकको वातावरणीय प्रभाव मुल्याङ्कन प्रतिवेदन लामो समयदेखि स्वीकृत नहुँदा सडक निर्माणमा समस्या हुँदै आएको थियो ।
मन्त्री यादवले वातावरण संरक्षण ऐन २०७६ को दफा ७ को उपदफा (५) र वातावरण संरक्षण नियमावली, २०७७ को नियम ९ को उपनियम (८) बमोजिम माननीय मन्त्रिस्तरीय निर्णय गर्नु भइ उक्त सडकको वातावरणीय प्रभाव मुल्याङ्कन प्रतिवेदन स्वीकृत गर्नु भएको हो । प्रतिवेदन स्वीकृत भएपछि अब उक्त सडक निर्माणका लागि सहज भएको मन्त्रालयले जनाएको छ । उक्त सडक निर्माण भएपछि अब कञ्चनपुरबाट डडेल्धुरा जानका लागि कम्तिमा पनि तीन घण्टा मात्रै लाग्ने बङ्कका स्थानीयवासी तथा समाजसेवी सुरेन्द्र बमले जानकारी दिनुभयो ।
यसैगरी मन्त्री यादवले लुम्बिनी प्रदेश सरुवा रोग अस्पताल कपिलबस्तुमा रहेको ५० शैया तथा बाँझकटेरी–ढोरपाटन खण्ड (सालझण्डि–सन्धिखर्क–ढोरपाटन ७१ किमी सडक, हुम्ला, कर्णाली जलविद्युत आयोजना (६०.७४ मेगावाट) हुम्ला, रहफ–भैरवस्थान–भानकोट–कालिकोट–हिल्सा चिन सडक तथा मेची महाकाली विद्युतिय रेलमार्गको निजगढ–हेटौँडा–भरतपुर खण्डको पनि मन्त्रिस्तरीय निर्णय गर्नु भइ वातावरणीय प्रभाव मुल्याङ्कन प्रतिवेदन स्वीकृत गर्नु भएको उहाँको सचिवालयले जनाएको छ । विमल विष्ट
