सुटुक्क एसपीपी सम्झौता गर्ने देउवाको तयारी
अमेरिकी सेनाको नेपाल आगमनलाई कानूनी आधार तयार गर्ने उद्देश्यका निम्ति हुने भनिएको सम्झौता प्रधानमन्त्री शेरबहादुर देउवाको अमेरिका भ्रमणका क्रममा हुने जानकारी सम्वद्ध सूत्रबाट प्राप्त भएको छ ।
गत असारमै गर्ने अन्तिम तयारीमा रहेको एसपीपी सम्झौताको प्रस्तावित दस्तावेज सार्वजनिक भएपछि देउवा–प्रचण्ड सरकार निकै अप्ठ्यारोमा परेको थियो । उक्त प्रस्तावको चौतर्फी विरोध भएपछि मन्त्रिमण्डलको बैठकले एसपीपी सम्झौताको प्रस्ताव अस्वीकार गर्ने निर्णय लिएको बताइए पनि सरकारले पत्राचार गरेर अमेरिकालाई सोको जानकारी गराएको छैन । र, त्यसरी पत्राचार गर्ने सम्भावना पनि नरहेको एकथरी विज्ञहरूको भनाइ छ । बरु एसपीपी या त्यसको शीर्षक बदलेर त्यसअनुरुपकै सम्झौता गर्ने तयारी भइरहेको बुझिएको छ ।
प्राप्त जानकारीअनुसार आगामी सेप्टेम्बरमा हुने संयुक्त राष्ट्रसङ्घको सतहत्तरौँ महासभामा भाग लिन प्रधानमन्त्री शेरबहादुर देउवा आफ्नो एउटा जम्बो टोलीसहित अमेरिका जाँदैछन् । सोही अवसरमा एसपीपी सम्झौतामा दस्तखत गर्ने योजना बनेको बताइएको छ । एसपीपी नाममै सम्झौता गर्दा उत्पन्न हुन सक्ने चर्को विरोध र प्रतिक्रियालाई दृष्टिगत गरी प्रस्तावित सम्झौताको शीर्षकलगायत कतिपय अन्तरवस्तु परिवर्तन गरेर भए पनि सम्झौता गरिने सम्वद्ध पक्षको दाबी छ ।
शेरबहादुर देउवाबाट त्यसरी सम्झौता हुन सक्ने देखिएपछि सत्तागठबन्धनका साझेदार दलहरू सशङ्कित र चिन्तित बनेका छन् । खासगरी माओवादी र समाजवादी दलहरूभित्र देउवाको अमेरिका भ्रमण र एसपीपी सम्झौताको विषयलाई लिएर चर्को बहस शुरु भएको छ । देउवालाई प्रधानमन्त्री पदबाट मूक्त गरेर भए पनि उक्त सम्झौतालाई रोक्नुपर्ने वामपन्थी युवा नेताहरूको भनाइ छ । गठबन्धन भत्काएर भए पनि देशको हितप्रतिकुल हुन सक्ने सम्झौता रोक्नुपर्छ भन्दै माओवादी पार्टीभित्र प्रचण्डमाथि तीव्र दबाब पैदा गरिरहेका छन् ।
