चितुवाको आक्रमणबाट काठमाडौंमा पाँचजना घाइते

 

 

काठमाडौंको नागर्जुनमा चितुवाको आक्रमणमा परी पाँच जना घाइते भएका छन् । नागार्जुन नगरपालिका वडा नम्बर ८ भीमढुङ्गा दर्शन खोलामा चितुवाको आक्रमणबाट एकै परिवारका चारजना सहित पाँच जना घाइते भएका हुन् । मध्यरातमा करिब १ बजे घरसँगै रहेको कुखुरा पालेको छाप्रोमा चितुवा पसेपछि लखेट्न जाँदा चितुवाले आक्रमण गरेको वडाध्यक्ष सुरज कुमार पोखरेलले  बताए ।

उनले भने, ‘लोकल कुखुरा पालेकोछाप्रोमा कुखुरा खान पसेपछि हल्लाखल्ला भएको थियो । लखेटन जाँदा परिवारका ४ जना र छिमेकीलाई समेत आक्रमण गरेको थियो ।’ घाइतेहरुलाई उपचारको लागि राति नै मनमोहन अस्पताल लगिएको थियो । उनका अनुसार घाइते भएका पाँचजना मध्ये २ जना डिस्चार्ज भएका छन् भने तीन जनाको उपचार भइरहेको छ ।

उपचार भइइरहेको मध्ये हजुरआमाको अवस्था गम्भीर रहेको छ ।  कुखुरा कुरेर त्यहीँ छाप्रोमा बसेका राम भट्टराईले खोरमा विरालो पस्यो भनेर बाबुआमालाई बोलाउन गएका थिए । विरालो भनेर धपाउन जाँदा चितुवाले हजुरआमा सानीमैया भट्टराई बुबा कुमार भट्टराई,आमा सरस्वतिलाई आक्रमण गरेको थियो । हल्लाखल्ला भएपछि पुगेका छिमेकी सुविन भट्टराई समेत घाइते भए । आमा सरस्वतीका हात भाँचिएको छ भने बुबा कुमारको घाटी र टाउँकोमा चोट लागेको छ । हजुरआमाको टाउकोमा चोट लागेर टाका लगाइएको छ । भने रामको हातमा चोटलागेको छ ।