जसपाले सवै मन्त्री फिर्ता बोलायो
सत्तारुढ जनता समाजवादी पार्टी (जसपा)ले पार्टीबाट सरकारमा सहभागी सबै मन्त्रीलाई फिर्ता बोलाएको छ । जसपा अध्यक्ष उपेन्द्र यादवले कार्यकारिणी समितिले प्रत्यायोजन गरेको अधिकार प्रयाग गर्दै प्रधानमन्त्री शेरबहादुर देउवा नेतृत्वको सरकारमा सहभागी पार्टीका सवै मन्त्रीलाई फिर्ता बोलाउनु भएको हो ।
जसपाका कार्यलय सचिव प्रकाश अधिकारी सम्पूर्ण मन्त्रीलाई फिर्ता बोलाइएको पुष्टि गर्नुभयो । मन्त्रीहरुलाई फिर्ता बोलाइए पनि नयाँ मन्त्रीको नाम भने तय भइनसकेको अधिकारीले बताउनु भयो ।
जसपाबाट संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठ, भौतिक पूर्वाधार तथा यातायात मन्त्री रेणुकुमारी यादव, वन मन्त्री रामसहायप्रसाद यादव र कृषि तथा पशुपंक्षि विकास मन्त्री महिन्द्र राय यादव मन्त्री हुनुहुन्छ । यसअघि सत्तारुढ नेकपा एकीकृत समाजवादीले मन्त्री फिर्ता बोलाएको थियो ।
मन्त्री फिर्ता बोलाउने निर्णयसँगै जसपा औपचारिक बिभाजनको अवस्थामा पुगेको छ । अध्यक्ष यादव र संघीय परिषद अध्यक्ष डा. बाबुराम भट्टराईले सहमतिमै अलग अलग बाटो हिडने निर्णय लिइसक्नु भएको छ ।
