उपमेयरमा सुनिता डंगोललाई प्रतिस्पर्धीभन्दा चार गुना बढी मत
काठमाडौं महानगरपालिकामा उपमेयरकी उम्मेदवार सुनिता डंगोललाई प्रतिस्पर्धीको भन्दा झण्डै चार गुना मत प्राप्त भएको छ । निर्वाचन कार्यालयले सार्वजनिक गरेको पछिल्लो तथ्यांकअनुसार एमाले उम्मेदवार सुनिताले निकै ठूलो मतान्तरमा अग्रता लिनुभएको हो ।
आयोगले ३५ हजार ८ सय ९४ मत गणना भइसकेको जानकारी दिएको छ । जसमध्ये उपमेयरमा एमाले उम्मेदवार सुनिताले १३ हजार ४ सय ८ मत पाउनु भएको छ । उहाँका प्रतिस्पर्धी गठबन्धनका तर्फबाट उम्मेदवार बनेका नेकपा एकीकृत समाजवादीका उम्मेदवारले जम्मा ४१ सय १८ मत पाउनु भएको हो । उपमेयरमा राप्रपाका उम्मेदवारले २५ सय ५५ मत पाएका छन ।
मेयरमा भने स्वतन्त्र उम्मेदवार बालेन साहले अग्रता कायमै राख्नुभएको छ । साहले १३ हजार ८ सय ८८ मत पाउनु भएको छ । यस्तै एमालेका केशव स्थापितले ७ हजार ३ सय ६३ मत पाउनु भएको छ भने कांग्रेसकी सिर्जना सिंहले ६ हजार ४ सय ९४ मत पाउनु भएको छ । निर्वाचन आयोगका अनुसार काठमाडौं महानगरमा १३ सय ३७ मत पुर्ण बदर भएको छ ।
