गठबन्धनको भन्दा दोब्बर मत ल्याएर जित्छु : केशव स्थापित
नेकपा एमालेका तर्फबाट काठमाडौं महानगरको प्रमुख पदका उम्मेदवार केशव स्थापितले आफूले गठबन्धनको उम्मेदवार भन्दा दोब्बर मत ल्याउने दाबी गरेका छन् । उम्मेदवारी दर्ता गराएपछि पत्रकारहरूसँग कुराकानी गर्दै स्थापितले आफ्नो उम्मेदवारी दर्तासँगै गठबन्धनको गेम ओभर भएको बताए ।
‘कांग्रेसको स्थायी भोट ४५ हजार मात्रै हो । माओवादीको ७ हजार । सबै खस्यो भने पनि ५२ हजार होला । समाजवादीले भोट लग्यो भने गठबन्धनको ५५–५८ हजार होला । काठमाडौंका जनताले पहिल्यै ८४ हजार ६ सय मत दिएको मान्छे हुँ म । त्यसैले गेम इज ओभर । हामी चुनाव जित्छौँ’, स्थापितले भने ।
उनले ‘सानातिना विवादले आफूलाई असर नगर्ने’ समेत उल्लेख गरे । ‘विवादमा नआउने पनि केशव स्थापित हुन्छ ? मलाई यस्ता विवादले केही असर गर्दैन । मैले बनाएको माइतीघरमा नाराबाजी गर्नेहरू सबै मेरा मतदाता हुन्’, स्थापितले भने ।
उनले महानगरभित्र रहेका कलेजहरूको भवन नयाँ बनाउने बताए । त्रिचन्द्र कलेजमा नयाँ टावर बनाएर प्राज्ञिक केन्द्र खडा गर्ने स्थापितको भनाई छ ।
